சுவிட்சர்லாந்தில் பெற்றோருக்கான அழுத்தம் அதிகரிப்பு

சுவிட்சர்லாந்தில் பெற்றோருக்கான அழுத்தம் அதிகரிப்பு: மனநல பாதிப்புக்கு முக்கிய காரணம் குடும்ப பொறுப்பு என ஆய்வு

சுவிட்சர்லாந்தில் பெரியவர்களின் மனநலத்தை அதிகமாக பாதிக்கும் முக்கிய காரணமாக “பெற்றோர் பொறுப்பு” உருவெடுத்துள்ளதாக புதிய AXA ஆய்வு தெரிவித்துள்ளது. வேலை அழுத்தம் அல்லது பணப் பிரச்சினைகளை விட குழந்தைகளை வளர்ப்பதற்கான பொறுப்பே மனநலத்தில் அதிக தாக்கத்தை ஏற்படுத்துவதாக இந்த ஆய்வு சுட்டிக்காட்டுகிறது.

AXA காப்புறுதி நிறுவனம் வெளியிட்டுள்ள தகவலின்படி, தற்போது சுவிட்சர்லாந்தில் ஒவ்வொரு நான்கு பெரியவர்களில் ஒருவராவது ஏதாவது ஒரு மனநல பிரச்சினையால் பாதிக்கப்பட்டுள்ளனர்.

குறிப்பாக, 18 முதல் 24 வயதுக்குள் உள்ள இளைஞர்களே அதிகளவில் பாதிக்கப்பட்டுள்ளதாக தெரிவிக்கப்பட்டுள்ளது. இந்த வயது பிரிவில் சுமார் 39 சதவீதம் பேர் மனநல சவால்களை எதிர்கொண்டு வருவதாக ஆய்வு கூறுகிறது.

மேலும், கடந்த நான்கு ஆண்டுகளில் மனநல பிரச்சினைகளுடன் தொடர்புடைய disability insurance கோரிக்கைகள் 78 சதவீதம் வரை அதிகரித்துள்ளதாக AXA குறிப்பிட்டுள்ளது.

குழந்தைகளை பராமரித்தல், வேலை மற்றும் குடும்ப வாழ்க்கையை சமநிலைப்படுத்துதல் போன்ற காரணங்களால் பெற்றோரின் மனஅழுத்தம் அதிகரித்து வருவதாக நிபுணர்கள் கூறுகின்றனர். குறிப்பாக, வெளிநாட்டில் வாழும் expat குடும்பங்களுக்கு உறவினர்கள் மற்றும் குடும்ப ஆதரவு இல்லாத சூழலில் குழந்தைகளை வளர்ப்பது கூடுதல் சவாலாக மாறியுள்ளது.

சுவிட்சர்லாந்தில் மனநலம் தொடர்பான விவாதங்கள் அண்மைக் காலங்களில் அதிகரித்து வரும் நிலையில், குடும்பங்களுக்கு ஆதரவு சேவைகள் மற்றும் மனநல உதவிகள் மேலும் வலுப்படுத்தப்பட வேண்டும் என்ற கோரிக்கைகளும் அதிகரித்து வருகின்றன.