இரட்டை குடியுரிமை கொண்ட பிரெஞ்சு-சுவிஸ் ஆண்களுக்கு இராணுவ சேவை கட்டாயமாகலாம்

2 days ago

565

சுவிட்சர்லாந்து மற்றும் பிரான்ஸ் ஆகிய நாடுகளின் இரட்டை குடியுரிமை கொண்ட ஆண்கள் எதிர்காலத்தில் சுவிஸ் இராணுவ சேவையை கட்டாயமாக நிறைவேற்ற வேண்டிய சூழல் உருவாகியுள்ளது.

1999 ஆம் ஆண்டு இரு நாடுகளுக்கும் இடையில் செய்யப்பட்ட ஒப்பந்தத்தின் அடிப்படையில், சுவிஸ் மற்றும் பிரெஞ்சு இரட்டை குடியுரிமை கொண்ட இளைஞர்கள், பிரான்சில் நடைபெறும் “Défense et Citoyenneté Day” எனப்படும் குடியுரிமை மற்றும் பாதுகாப்பு தின நிகழ்ச்சியில் பங்கேற்றால், சுவிஸ் இராணுவ சேவையிலிருந்து விலக்கு பெற முடிந்தது.

ஆனால், இந்த நடைமுறை சுவிஸ் இளைஞர்களுடன் ஒப்பிடுகையில் சமத்துவமற்ற அணுகுமுறையாக இருப்பதாக அரசியல் வட்டாரங்களில் விமர்சனம் எழுந்துள்ளது.

இந்த சட்ட இடைவெளியை முடிவுக்கு கொண்டு வர வேண்டும் என வலியுறுத்தியவர்களில் நாடாளுமன்ற உறுப்பினர் மௌரோ பொஜ்ஜியா (Mauro Poggia) முக்கியமாக உள்ளார். “இது, கட்டாய இராணுவ சேவையை நிறைவேற்ற வேண்டிய இளம் சுவிஸ் குடிமக்களுடன் ஒப்பிடுகையில் வெளிப்படையான சமத்துவமின்மையை உருவாக்குகிறது” என அவர் தெரிவித்துள்ளார்.

இதையடுத்து, வியாழக்கிழமை நடைபெற்ற வாக்கெடுப்பில் நாடாளுமன்ற உறுப்பினர்கள் இந்த முன்மொழிவை ஆதரித்துள்ளனர். அதேவேளை, சுவிட்சர்லாந்தில் வசிக்கும் அனைத்து இரட்டை குடியுரிமை கொண்ட ஆண்களுக்கும் இந்த கட்டாய இராணுவ சேவை விதி விரிவுபடுத்தப்படவுள்ளதாக தெரிவிக்கப்பட்டுள்ளது.

இருப்பினும், இந்த மாற்றம் முழுமையாக அமலுக்கு வருவதற்கு இன்னும் மேலதிக அரசியல் மற்றும் சட்ட நடவடிக்கைகள் தேவைப்படுகின்றன.