கான்ஸ்டன்ஸ் ஏரியின் இருண்ட மர்மம்… 103 பேரின் தலைவிதி இன்னும் புதிர்!

கான்ஸ்டன்ஸ் ஏரியின் இருண்ட மர்மம்… 103 பேரின் தலைவிதி இன்னும் புதிர்!

சுவிட்சர்லாந்து, ஜெர்மனி மற்றும் ஆஸ்திரியா நாடுகளின் எல்லைகளை இணைக்கும் கான்ஸ்டன்ஸ் ஏரி… இயற்கை அழகுக்குப் பெயர் பெற்ற இந்த ஏரி, இன்று வரை விடை கிடைக்காத ஒரு பயங்கர மர்மத்தையும் தன்னுள் புதைத்து வைத்திருக்கிறது.

கடந்த ஆகஸ்ட் 2025-ல், யூபர்லிங்கன் அருகே நடைபெற்ற தொழில்நுட்ப மூழ்குதல் பயிற்சியின்போது, 102 மீட்டர் ஆழத்தில் ஒரு மனித உடல் கண்டெடுக்கப்பட்டது. சுவிஸ் காவல்துறை மூழ்காளர்கள் பல மணி நேர போராட்டத்திற்குப் பிறகு அந்த உடலை மீட்டனர்.

தடயவியல் பரிசோதனையில், அது 16 ஆண்டுகளுக்கு முன்பு காணாமல் போன நபரின் உடல் என்பது உறுதி செய்யப்பட்டது. அவர் நீரில் மூழ்கி உயிரிழந்ததாக தெரியவந்தாலும், அந்த இறப்பின் பின்னணியில் என்ன நடந்தது என்பது இன்னும் மர்மமாகவே உள்ளது.

இதற்கிடையில், கான்ஸ்டன்ஸ் ஏரியில் 103 பேர் காணாமல் போயிருப்பதாக ஏரி காவல்துறையின் அதிகாரப்பூர்வமற்ற பட்டியல் தெரிவிக்கிறது.

536 சதுர கிலோமீட்டர் பரப்பளவும், 251 மீட்டர் ஆழமும் கொண்ட இந்த ஏரியில், ஒருவரைத் தேடுவது வைக்கோல் போரில் ஊசியைத் தேடுவதைப் போன்றது என அதிகாரிகள் கூறுகின்றனர்.

மேலும், சக்திவாய்ந்த நீரோட்டங்கள் உடல்களை பல கிலோமீட்டர் தூரம் இழுத்துச் செல்லக்கூடும். ஆழமான நீரில் ஆக்ஸிஜன் குறைவாகவும், வெப்பநிலை மிகக் குறைவாகவும் இருப்பதால், உடல்கள் மிகவும் மெதுவாகச் சிதைவடைகின்றன. சில உடல்கள் சேறு, பாறைகள் மற்றும் நீர்த் தாவரங்களில் சிக்கி, மீண்டும் மேற்பரப்பிற்கு வராமலேயே ஏரியின் அடிப்பகுதியில் நிரந்தரமாக தங்கிவிடுகின்றன.

இருப்பினும், டயாட்டம் எனப்படும் நுண்ணுயிரிகளை ஆய்வு செய்வதன் மூலம், ஒருவர் எந்த நீர்நிலையில் தனது கடைசி மூச்சை விட்டார் என்பதைக் கூட தடயவியல் நிபுணர்களால் கண்டறிய முடிகிறது.

ஆனால் அனைத்து நவீன தொழில்நுட்பங்களும் இருந்தபோதிலும், கான்ஸ்டன்ஸ் ஏரியின் ஆழத்தில் காணாமல் போன 100-க்கும் மேற்பட்டோரின் தலைவிதி… இன்றுவரை விடை தெரியாத மர்மமாகவே தொடர்கிறது.