“36°C வெப்பத்தில் கொழுந்துவிட்ட தீ… சில நிமிடங்களில் கருகிய வயல்வெளி!”

“36°C வெப்பத்தில் கொழுந்துவிட்ட தீ… சில நிமிடங்களில் கருகிய வயல்வெளி!”

சுவிட்சர்லாந்தில் நிலவி வரும் கடுமையான வெப்ப அலை, தற்போது மேலும் ஒரு தீ விபத்துக்கு காரணமாகியுள்ளது. சோலோதூர்ன் மாகாணத்தின் நியூண்டார்ஃப் Neuendorfபகுதியில் உள்ள வைக்கோல் வயல் ஒன்றில் ஏற்பட்ட தீ விபத்து, சில நிமிடங்களிலேயே முழு வயலையும் கருகச் செய்துள்ளது.

வியாழக்கிழமை பிற்பகலில், சுமார் 36 டிகிரி செல்சியஸ் வெப்பநிலை பதிவான நிலையில் இந்த தீ விபத்து ஏற்பட்டது. சம்பவத்தை நேரில் பார்த்தவர்கள் கூறுகையில், “மிகக் குறுகிய நேரத்தில் வயல் முழுவதும் கருகிவிட்டது” என்று தெரிவித்துள்ளனர்.

தகவல் கிடைத்தவுடன் பல்வேறு தீயணைப்புத் துறைகளைச் சேர்ந்த வீரர்கள் சம்பவ இடத்திற்கு விரைந்து வந்து, ஒரு மணி நேரத்திற்கும் மேலாக போராடி தீயை கட்டுப்பாட்டுக்குள் கொண்டு வந்தனர். தீ முற்றிலும் அணைந்ததை உறுதி செய்வதற்காக, வயல் முழுவதும் தோண்டி, உள்ளே இன்னும் எரிந்துகொண்டிருக்கும் தீப்பிழம்புகளையும் அணைக்கும் பணியில் அவர்கள் ஈடுபட்டனர்.

தீ விபத்திற்கான சரியான காரணம் இன்னும் உறுதியாகத் தெரியவில்லை. இருப்பினும், வயலில் பயன்படுத்தப்பட்டிருந்த அறுவடை இயந்திரத்தில் ஏற்பட்ட தொழில்நுட்பக் கோளாறு அல்லது கடும் வெப்பம் காரணமாக தீப்பிடித்திருக்கலாம் என்ற சந்தேகம் எழுந்துள்ளது. தீயில் அந்த அறுவடை இயந்திரமும் சேதமடைந்துள்ளது.

சோலோதூர்ன் மாகாண காவல்துறையின் தகவலின்படி, பிற்பகல் 3.15 மணியளவில் தீ பற்றிய தகவல் கிடைத்தது. தீயணைப்பு வீரர்களின் விரைவான நடவடிக்கையால் தீ கட்டுப்பாட்டுக்குள் கொண்டுவரப்பட்டதுடன், இந்தச் சம்பவத்தில் யாருக்கும் காயம் ஏற்படவில்லை என்பதும் நிம்மதியை ஏற்படுத்தியுள்ளது.

தொடர்ந்து நீடித்து வரும் வெப்பம் மற்றும் வறட்சியான சூழல் காரணமாக, வயல்வெளிகள் மற்றும் காடுகளில் தீ விபத்து ஏற்படும் அபாயம் அதிகரித்துள்ளதாக அதிகாரிகள் எச்சரித்துள்ளனர். பொதுமக்கள் தீ தொடர்பான பாதுகாப்பு விதிமுறைகளை கண்டிப்பாகப் பின்பற்ற வேண்டும் என்றும், திறந்த வெளிகளில் அலட்சியமாக நெருப்பு பயன்படுத்துவதைத் தவிர்க்க வேண்டும் என்றும் அறிவுறுத்தப்பட்டுள்ளது.