லூசேர்ன் பகுதியில் தொலைபேசி மோசடி அதிகரிப்பு – ஆயிரக்கணக்கான பிராங்குகள் இழப்பு

லூசேர்ன் பகுதியில் தொலைபேசி மோசடி அதிகரிப்பு – ஆயிரக்கணக்கான பிராங்குகள் இழப்பு

சுவிட்சர்லாந்தின் லூசேர்ன் கன்டோனில் சமீப நாட்களாக தொலைபேசி மூலமான மோசடி முயற்சிகள் அதிகரித்து வருவதாக லூசேர்ன் போலீசார் எச்சரிக்கை விடுத்துள்ளனர். பல டஜன் புகார்கள் போலீசாரிடம் பதிவாகியுள்ள நிலையில், ஒரு சம்பவத்தில் மோசடிக்காரர்கள் வங்கி கணக்கிலிருந்து ஆயிரக்கணக்கான சுவிஸ் பிராங்குகளை அபகரித்துள்ளனர்.

பாதிக்கப்பட்ட பலர், தங்களுக்கு வந்த சந்தேகத்திற்கிடமான தொலைபேசி அழைப்புகள் குறித்து தினமும் லூசேர்ன் போலீசாரிடம் தகவல் வழங்கி வருகின்றனர். இந்த மோசடிகளில் ஈடுபடுவோர் பெரும்பாலும் வங்கியின் பாதுகாப்பு பிரிவு ஊழியர்களாக தங்களை அறிமுகப்படுத்தி, “உங்கள் கணக்கில் சந்தேகத்திற்கிடமான பண பரிமாற்றம் கண்டறியப்பட்டுள்ளது” என கூறி மக்களை ஏமாற்ற முயற்சிக்கின்றனர்.

லூசேர்ன் கன்டோனில் இடம்பெற்ற ஒரு சம்பவத்தில், பாதிக்கப்பட்ட நபரிடம் மோசடிக்காரர்கள் தொலைநிலை கணினி கட்டுப்பாட்டு மென்பொருள் ஒன்றை நிறுவச் செய்துள்ளனர். அதன் பின்னர் அந்த மென்பொருளின் உதவியுடன் வங்கி கணக்கை அணுகி, பல ஆயிரம் சுவிஸ் பிராங்குகளை அவர்கள் திருடிச் சென்றதாக தெரிவிக்கப்பட்டுள்ளது.

இந்த நிலையில் பொதுமக்கள் மிகவும் எச்சரிக்கையாக இருக்க வேண்டும் என லூசேர்ன் போலீசார் மீண்டும் வலியுறுத்தியுள்ளனர்.

எதிர்பாராத தொலைபேசி அழைப்புகள் வந்தால் உடனடியாக நம்ப வேண்டாம் என்றும், தனிப்பட்ட தகவல்கள், வங்கி விவரங்கள் அல்லது கிரெடிட் கார்டு தகவல்களை ஒருபோதும் பகிரக்கூடாது என்றும் அதிகாரிகள் அறிவுறுத்தியுள்ளனர்.

மேலும், அந்நிய நபர்களிடம் பணமோ பெறுமதியான பொருட்களோ ஒப்படைக்க வேண்டாம் என்றும், அழுத்தம் கொடுத்து பேசும் நபர்களின் அழைப்புகளை உடனடியாக துண்டிக்க வேண்டும் என்றும் போலீசார் தெரிவித்துள்ளனர். சந்தேகம் இருந்தால் நேரடியாக வங்கி அல்லது போலீசை தொடர்புகொள்ளுமாறும் கேட்டுக்கொள்ளப்பட்டுள்ளது.

இவ்வாறான இணைய மற்றும் தொலைபேசி மோசடி முயற்சிகளை சுவிட்சர்லாந்து மத்திய இணைய பாதுகாப்பு மையத்தின் அதிகாரப்பூர்வ இணையதளம் மூலம் பொதுமக்கள் புகாரளிக்கலாம்.

ஏற்கனவே பணம் இழந்திருந்தாலோ அல்லது தனிப்பட்ட தகவல்களை பகிர்ந்திருந்தாலோ உடனடியாக வங்கி கணக்குகள் மற்றும் வங்கி அட்டைகளை முடக்க நடவடிக்கை எடுக்க வேண்டும் என்றும், அருகிலுள்ள போலீஸ் நிலையத்தில் புகார் அளிக்க வேண்டும் என்றும் அதிகாரிகள் அறிவுறுத்தியுள்ளனர்.

சுவிட்சர்லாந்தில் சமீப காலமாக “Banking Security Call” எனப்படும் இந்த புதிய மோசடி முறை வேகமாக பரவி வருவதால், குறிப்பாக வயதானவர்கள் மற்றும் இணைய பாதுகாப்பு குறித்த விழிப்புணர்வு குறைவானவர்கள் அதிகம் இலக்காக மாறி வருகின்றனர். ©LU