சுவிட்சர்லாந்தில் குறைந்தபட்ச சுகாதார காப்பீட்டு டிடக்டிபிள் 100 ஃப்ராங்க் உயர வாய்ப்பு

சுவிட்சர்லாந்தில் குறைந்தபட்ச சுகாதார காப்பீட்டு டிடக்டிபிள் 100 ஃப்ராங்க் உயர வாய்ப்பு

சுவிட்சர்லாந்தில் சுகாதார செலவுகள் தொடர்ந்து அதிகரித்து வரும் நிலையில், அந்தச் செலவுகளை கட்டுப்படுத்தும் நோக்கில் மத்திய அரசு புதிய மாற்றத்தை பரிசீலித்து வருகிறது. அதன்படி, சுகாதார காப்பீட்டில் தற்போது நடைமுறையில் உள்ள குறைந்தபட்ச “டிடக்டிபிள்” (deductible) அதாவது தொகை சுயச் செலவு தொகையை 300 சுவிஸ் ஃப்ராங்கிலிருந்து 400 ஃப்ராங்காக உயர்த்தும் திட்டத்தை கூட்டாட்சி அரசு முன்வைத்துள்ளது.

சுவிட்சர்லாந்தில் மருத்துவ காப்பீட்டு முறையின் ஒரு பகுதியாக “டிடக்டிபிள்” (Franchise) எனப்படும் தொகையை நோயாளிகள் முதலில் தாங்களே செலுத்த வேண்டும். அதற்குப் பிறகே காப்பீட்டு நிறுவனம் மீதமுள்ள மருத்துவச் செலவுகளை ஏற்கிறது. தற்போது 300 ஃப்ராங்க் என்ற குறைந்தபட்ச டிடக்டிபிள் தொகையை சுமார் 45 சதவீத மக்கள் தேர்வு செய்து பயன்படுத்தி வருகின்றனர்.

இந்த நிலையில், சுகாதார அமைப்பின் அதிகரித்து வரும் செலவுகளை சமாளிக்க மக்கள் மருத்துவ சேவைகளை பயன்படுத்தும் போது அதிக பொறுப்புடன் நடந்து கொள்ள வேண்டும் என்ற நோக்கத்தில் இந்த மாற்றம் முன்மொழியப்பட்டுள்ளது. இதற்காக கூட்டாட்சி அமைச்சர்கள் சுவிட்சர்லாந்தின் சுகாதார காப்பீட்டு சட்டமான Federal Health Insurance Act (LAMal) இல் திருத்தம் செய்யும் முன்மொழிவை தற்போது ஆலோசனைக்காக வெளியிட்டுள்ளனர்.

அரசாங்கம் வழங்கிய விளக்கத்தின் படி, 1996 ஆம் ஆண்டில் LAMal சட்டம் அமலுக்கு வந்த காலத்திலிருந்து சுகாதார காப்பீட்டு நிறுவனங்கள் ஏற்க வேண்டிய செலவுகள் தற்போது மூன்று மடங்கு அதிகரித்துள்ளன. மருத்துவ சேவைகள், மருந்துகள் மற்றும் சிகிச்சை செலவுகள் தொடர்ந்து உயர்ந்து வருவதும் இந்த உயர்வுக்கு முக்கிய காரணமாகக் குறிப்பிடப்படுகிறது.

அரசாங்கத்தின் கருத்துப்படி, டிடக்டிபிள் தொகையை உயர்த்தினால் மருத்துவச் செலவுகளின் ஒரு பகுதியை மக்கள் நேரடியாக ஏற்க வேண்டியிருக்கும். இதனால் தேவையற்ற மருத்துவ சேவைகளை பயன்படுத்துவது குறையலாம். அதே நேரத்தில் சுகாதார காப்பீட்டு நிறுவனங்களின் செலவுகளும் ஓரளவு குறைய வாய்ப்பு இருப்பதால், காப்பீட்டு பிரீமியம் அதிகரிப்பின் அழுத்தத்தையும் குறைக்க முடியும் என அதிகாரிகள் நம்புகின்றனர்.

சுவிட்சர்லாந்தில் ஒவ்வொரு ஆண்டும் சுகாதார காப்பீட்டு பிரீமியம் உயர்வது பொதுமக்களுக்கு பெரிய பொருளாதார சுமையாக மாறி வருகிறது. இதை கட்டுப்படுத்த பல்வேறு மாற்றங்கள் குறித்து அரசு மற்றும் அரசியல் வட்டாரங்களில் தொடர்ந்து விவாதங்கள் நடைபெற்று வருகின்றன. தற்போது முன்வைக்கப்பட்டுள்ள இந்த டிடக்டிபிள் உயர்வு திட்டம் அந்த விவாதத்தின் ஒரு பகுதியாக பார்க்கப்படுகிறது.

இந்த முன்மொழிவை குறித்து அரசாங்கம் தற்போது ஆலோசனை செயல்முறையை தொடங்கியுள்ளது. அரசியல் கட்சிகள், சுகாதார அமைப்புகள் மற்றும் பொதுமக்கள் உள்ளிட்ட பல தரப்பினரிடமிருந்து கருத்துக்கள் பெறப்பட்ட பிறகு இறுதி முடிவு எடுக்கப்படும் என எதிர்பார்க்கப்படுகிறது.

© KeystoneSDA