தரையிறங்கும் சக்கரத்தில் கோளாறு… லூசெர்ன் ஏரியில் விழுந்த விமானம்!

தரையிறங்கும் சக்கரத்தில் கோளாறு… லூசெர்ன் ஏரியில் விழுந்த விமானம்!

சுவிட்சர்லாந்தின் லூசெர்ன் ஏரியில் கடந்த ஆண்டு இடம்பெற்ற விமான விபத்து தொடர்பான விசாரணையை சுவிஸ் போக்குவரத்து பாதுகாப்பு விசாரணை வாரியம் நிறைவு செய்துள்ளது.

2025ஆம் ஆண்டு ஜூலை 28ஆம் தேதி காலை, புவோக்ஸ் விமான நிலையத்திலிருந்து ஆஸ்திரிய விமானி ஒருவர் தனது விமானத்தை இயக்கிச் சென்றார்.

புறப்பட்ட ஒரு நிமிடத்திற்குப் பின்னர், விமானத்தின் தரையிறங்கும் சக்கரத்தில் மீண்டும் கோளாறு ஏற்பட்டிருப்பது தெரியவந்தது.

இதையடுத்து விமானி வான்வழிப் போக்குவரத்துக் கட்டுப்பாட்டு மையத்தைத் தொடர்புகொண்டு, விமானத்தை மீண்டும் புவோக்ஸ் விமான நிலையத்திற்குத் திருப்ப முயன்றார்.

ஆனால், அந்த நேரத்தில் நிலவிய தாழ்வான மேகக்கூட்டம் காரணமாக, கட்டுப்பாட்டு மையம் பரிந்துரைத்த அணுகு வழியை அவர் பயன்படுத்தவில்லை.

அதற்குப் பதிலாக, பர்கன்ஸ்டாக் பகுதியைச் சுற்றி விமான நிலையத்தை அணுக முயன்றார்.

ஆனால் புறப்பட்டு மூன்று நிமிடங்களுக்குள், விமானம் லூசெர்ன் ஏரியில் அவசரமாகத் தரையிறங்கியது.

ஒற்றை எஞ்சின் டர்போப்ராப் விமானம், கெர்சிடென் பகுதியில் கரையிலிருந்து சுமார் 700 மீட்டர் தொலைவில் ஏரியில் நொறுங்கியது.

விமானத்தில் விமானியுடன் ஒரு பயணியும் இருந்தார்.

அதிர்ஷ்டவசமாக, விமானிக்கு காயம் ஏற்படவில்லை. பயணிக்கு உடலின் மேற்பகுதியில் சிறிய காயங்கள் ஏற்பட்டன.

இருவரும் சுமார் 40 நிமிடங்கள் தண்ணீரில் இருந்த பின்னர், காவல் படகு மூலம் மீட்கப்பட்டனர்.

விபத்துக்குள்ளான விமானத்தின் உடைந்த பாகங்கள், சுமார் ஒரு மாதத்திற்குப் பின்னர், ஆகஸ்ட் 26ஆம் தேதி நடைபெற்ற பெரிய அளவிலான மீட்பு நடவடிக்கையில் ஏரியில் இருந்து வெளியே எடுக்கப்பட்டன.

விபத்துக்கு முன்னதாக, அதே நாளில் காலை 8:21 மணிக்கு விமானி தனது முதல் பயணத்தை மேற்கொண்டிருந்தார்.

அப்போது, தரையிறங்கும் சக்கரங்கள் பாதுகாப்பாக நிலைபெறவில்லை என்பதை காட்டும் எச்சரிக்கை விளக்கு எரிந்ததால், அவர் அந்தப் பயணத்தை ரத்து செய்து மீண்டும் புவோக்ஸ் விமான நிலையத்திற்குத் திரும்பியிருந்தார்.

பின்னர் விமானத்தின் கட்டுப்பாட்டு அலகு மீட்டமைக்கப்பட்டது. இதையடுத்து எச்சரிக்கை விளக்கு அணைந்தது.

ஆனால் முக்கியமான ஒரு சோதனை — தரையிறங்கும் சக்கரத்தை முழுமையாக நீட்டி, மீண்டும் சுருக்கி அதன் செயல்பாட்டை உறுதி செய்வது — மேற்கொள்ளப்படவில்லை என்று விசாரணை அறிக்கை தெரிவிக்கிறது.

இதன் பின்னர் மேற்கொண்ட இரண்டாவது விமானப் பயணத்திலேயே மீண்டும் கோளாறு ஏற்பட்டது.

விசாரணை வாரியத்தின் கூற்றுப்படி, இந்த சம்பவத்தில் எந்தவொரு அமைப்புரீதியான காரணமும் கண்டறியப்படவில்லை.

மேலும், பாதுகாப்பு விசாரணையின் நோக்கம் குற்றம் அல்லது பொறுப்பை நிர்ணயிப்பது அல்ல என்றும் வாரியம் தெளிவுபடுத்தியுள்ளது.

இதனால் இந்த சம்பவம் தனிப்பட்ட சம்பவமாக வகைப்படுத்தப்பட்டு, விசாரணை தற்போது நிறைவு செய்யப்பட்டுள்ளது.

இந்நிலையில், இந்த விபத்து தொடர்பான குற்றவியல் விவகாரங்களில் கூட்டாட்சி வழக்கறிஞர் அலுவலகத்துக்கு அதிகார வரம்பு இருப்பதாகவும் தெரிவிக்கப்பட்டுள்ளது.