கழிவு எரிப்பு ஆலையில் மர்ம தீ! பலத்த சொத்து சேதம் – காரணம் குறித்து தீவிர விசாரணை

கழிவு எரிப்பு ஆலையில் மர்ம தீ! பலத்த சொத்து சேதம் – காரணம் குறித்து தீவிர விசாரணை…

சுவிட்சர்லாந்தின் சூரிச் மாகாணத்தில் உள்ள ஹின்வில் நகரில் அமைந்துள்ள கழிவு எரிப்பு ஆலையில் இன்று காலை ஏற்பட்ட தீ விபத்து பரபரப்பை ஏற்படுத்தியுள்ளது.

காலை சுமார் 10.15 மணியளவில், கெஸோ கழிவு எரிப்பு ஆலையின் ஒரு பகுதியில் திடீரென தீப்பற்றியதாக அதிகாரிகள் தெரிவித்துள்ளனர். ஆரம்பகட்ட தகவல்களின்படி, கன்வேயர் பெல்ட் மற்றும் ஷாஃப்ட் பகுதியில்தான் முதலில் தீ உருவானதாகக் கூறப்படுகிறது.

தீ விபத்தில் யாருக்கும் காயம் ஏற்படவில்லை என்பது நிம்மதியளிக்கும் தகவலாக இருந்தாலும், ஆலையில் கணிசமான சொத்து சேதம் ஏற்பட்டுள்ளதாக தெரிவிக்கப்பட்டுள்ளது.

கட்டிடத்தின் சிக்கலான அமைப்பும், அடர்த்தியான புகையும் காரணமாக தீயணைப்பு வீரர்கள் மீட்புப் பணியில் சவால்களை எதிர்கொண்டனர். இதனால் Alertswiss மூலம் பொதுமக்களுக்கு அவசர எச்சரிக்கை விடுக்கப்பட்டது. அப்பகுதியில் வசிப்பவர்கள் ஜன்னல் மற்றும் கதவுகளை மூடி வீட்டிற்குள் இருக்கவும், தேவையற்ற பயணங்களைத் தவிர்க்கவும் அறிவுறுத்தப்பட்டனர்.

பின்னர் பிற்பகல் 1.30 மணியளவில் நிலைமை கட்டுப்பாட்டுக்குள் வந்ததைத் தொடர்ந்து அந்த எச்சரிக்கை திரும்பப் பெறப்பட்டது.

இந்த தீ விபத்திற்கான சரியான காரணம் இன்னும் கண்டறியப்படவில்லை. சூரிச் மாகாண காவல்துறையின் நிபுணர்கள் சம்பவ இடத்தில் விரிவான விசாரணையை மேற்கொண்டு வருகின்றனர்.