பர்க்டார்ஃப் ரயிலில் பரபரப்பு… கைத்துப்பாக்கியுடன் நபர் கைது, போலீஸ் தீவிர விசாரணை!

பர்க்டார்ஃப் ரயிலில் பரபரப்பு… கைத்துப்பாக்கியுடன் நபர் கைது, போலீஸ் தீவிர விசாரணை!

சுவிட்சர்லாந்தின் பெர்ன் மாகாணத்தில், ஓடிக்கொண்டிருந்த ரயிலில் ஏற்பட்ட வாக்குவாதம் துப்பாக்கிச் சூடு வரை சென்ற சம்பவம் பெரும் பரபரப்பை ஏற்படுத்தியுள்ளது.

இந்தச் சம்பவம் சனிக்கிழமை இரவு, ஹாஸ்லே-ரூக்ஸாவ் மற்றும் பர்க்டார்ஃப் இடையே பயணித்த ரயிலில் இடம்பெற்றது.

ஆரம்பக்கட்ட விசாரணைகளின்படி, ரயிலில் பயணித்த ஒரு பதின்வயது இளைஞருக்கும், ஒரு ஆணுக்கும் இடையே முதலில் கடுமையான வாக்குவாதம் ஏற்பட்டுள்ளது.

அதன்போது, அந்த ஆண் இளைஞர் மீது மிளகுத் தெளிப்பானைப் பயன்படுத்தியதாகவும், பின்னர் அந்த இளைஞர் கத்தியைக் காட்டி மிரட்டியதாகவும் பெர்ன் மாகாண காவல்துறை தெரிவித்துள்ளது.

இந்த பதற்றமான சூழ்நிலையின் போது, அந்த ஆண் தன்னிடம் இருந்த கைத்துப்பாக்கியை வெளியே எடுத்து, தரையை நோக்கி ஒரு முறை சுட்டுள்ளார்.

துப்பாக்கிச் சத்தத்தால் ரயிலில் இருந்த பயணிகள் கடும் அதிர்ச்சியடைந்த நிலையில், சம்பந்தப்பட்ட இருவரும் பின்னர் ரயிலிலிருந்து வெளியேறியுள்ளனர்.

சம்பவத்திற்குப் பிறகு, பர்க்டார்ஃப் ரயில் நிலையத்தில் அந்த ஆண் கைது செய்யப்பட்டதுடன், அவரிடமிருந்த கைத்துப்பாக்கியும் பறிமுதல் செய்யப்பட்டது. சிறிது நேரத்தில், அந்த பதின்வயது இளைஞரும் ரயில் நிலையம் அருகே கைது செய்யப்பட்டார்.

இந்தச் சம்பவத்தில், சம்பந்தப்பட்ட நபர்களில் ஒருவருக்கு லேசான காயம் ஏற்பட்டதாகவும், ரயிலில் பயணித்த மற்ற பயணிகள் யாருக்கும் காயம் ஏற்படவில்லை என்றும் காவல்துறை தெரிவித்துள்ளது.

இந்த மோதலுக்கான துல்லியமான காரணம் என்ன என்பது குறித்து பெர்ன் மாகாண காவல்துறை தீவிர விசாரணை நடத்தி வருகிறது. சம்பவத்தை நேரில் கண்டவர்கள் முன்வந்து தகவல் வழங்குமாறும் அதிகாரிகள் கேட்டுக்கொண்டுள்ளனர்.