சுவிட்சர்லாந்தில் “10 மில்லியன் மக்கள் வேண்டாம்” வாக்கெடுப்பு

சுவிட்சர்லாந்தில் “10 மில்லியன் மக்கள் வேண்டாம்” வாக்கெடுப்பு – கோடிக்கணக்கில் செலவாகும் பிரச்சாரம்

சுவிட்சர்லாந்தில் வாக்கெடுப்புகள் நடைபெறுவது சாதாரண விடயமாக இருந்தாலும், இந்த முறை நாட்டின் முழு கவனத்தையும் ஈர்த்திருப்பது “10 மில்லியன் சுவிட்சர்லாந்துக்கு இல்லை” (No to 10 Million Switzerland) என்ற சர்ச்சைக்குரிய பிரேரணை தொடர்பான வாக்கெடுப்பாகும்.

நாட்டில் புலம்பெயர்தல் அதிகரித்து வருவதை கடுமையாக எதிர்த்து வரும் Swiss People’s Party இந்த பிரேரணையை முன்வைத்துள்ளது. சுவிட்சர்லாந்தின் மக்கள்தொகை 10 மில்லியனை தாண்டக்கூடாது என்பதே இந்த யோசனையின் மையக்கருவாகும். அதற்காக புலம்பெயர்தலை மேலும் கட்டுப்படுத்தும் நடவடிக்கைகள் தேவைப்படுகின்றன என அந்தக் கட்சி வலியுறுத்தி வருகிறது.

இந்த பிரேரணை அடுத்த மாதம் ஜூன் 14ஆம் திகதி நாடு முழுவதும் வாக்கெடுப்புக்கு வரவுள்ளது. இதனால், அதை ஆதரிப்பவர்களும் எதிர்ப்பவர்களும் தீவிர பிரச்சாரங்களில் இறங்கியுள்ளனர்.

புலம்பெயர்தலை கட்டுப்படுத்த வேண்டும் என்று வலியுறுத்தும் தரப்பினர், வீட்டு வசதி நெருக்கடி, போக்குவரத்து சிக்கல்கள், சுற்றுச்சூழல் அழுத்தம் மற்றும் வாழ்க்கைச் செலவின் உயர்வு போன்ற பிரச்சினைகளுக்கு மக்கள் தொகை அதிகரிப்பே முக்கிய காரணம் என கூறுகின்றனர்.

மறுபுறம், இந்த பிரேரணையை எதிர்க்கும் அரசியல் கட்சிகள், தொழிற்துறை அமைப்புகள் மற்றும் பொருளாதார நிபுணர்கள், வெளிநாட்டு தொழிலாளர்கள் இல்லாமல் சுவிட்சர்லாந்தின் மருத்துவம், கட்டுமானம், தகவல் தொழில்நுட்பம் மற்றும் சேவைத் துறைகள் கடுமையாக பாதிக்கப்படும் என எச்சரிக்கின்றனர். குறிப்பாக முதியோர் பராமரிப்பு மற்றும் சுகாதாரத் துறைகளில் ஏற்கனவே பணியாளர் பற்றாக்குறை காணப்படுவதாகவும் அவர்கள் சுட்டிக்காட்டுகின்றனர்.

இந்த வாக்கெடுப்பை மேலும் கவனத்திற்கு கொண்டு வந்திருப்பது, இதற்காக செலவிடப்படும் மிகப்பெரிய பிரச்சார நிதியாகும். சுவிஸ் கூட்டாட்சி தணிக்கை அலுவலகத்தின் தகவலின்படி, இந்த பிரேரணையை ஆதரிப்பவர்கள் சுமார் 6.44 மில்லியன் சுவிஸ் பிராங்குகளை பிரச்சார செலவுக்காக ஒதுக்கியுள்ளனர். ஆனால் இதற்கு எதிராக செயல்படும் தரப்புகள் அதைவிட அதிகமாக, சுமார் 9 மில்லியன் சுவிஸ் பிராங்குகளை ஒதுக்கியுள்ளதாக தெரிவிக்கப்பட்டுள்ளது.

இதுவரை நடைபெற்ற பல தேசிய வாக்கெடுப்புகளுடன் ஒப்பிடுகையில், இது மிக அதிக செலவில் நடைபெறும் அரசியல் பிரச்சாரங்களில் ஒன்றாக மாறியுள்ளதாக அரசியல் விமர்சகர்கள் கூறுகின்றனர்.

இந்த வாக்கெடுப்பு சுவிட்சர்லாந்தின் எதிர்கால குடியேற்றக் கொள்கை, பொருளாதார வளர்ச்சி மற்றும் சமூக அமைப்பை தீர்மானிக்கும் முக்கிய திருப்புமுனையாக பார்க்கப்படுகிறது. மக்கள் எந்த முடிவை எடுக்கிறார்கள் என்பது ஜூன் 14ஆம் திகதிக்குப் பிறகு தெளிவாகும்.

© bluewin