சூரிக் பகுதியில் வாகனச் சோதனையில் திருட்டு கருவிகளுடன் மூவர் கைது

சூரிக் பகுதியில் வாகனச் சோதனையில் திருட்டு கருவிகளுடன் மூவர் கைது

சூரிக் (Zürich) கன்டோனில் ஞாயிற்றுக்கிழமை அதிகாலை (15.02.2026) மேற்கொள்ளப்பட்ட வாகனச் சோதனையின் போது, திருட்டு சம்பவங்களுடன் தொடர்புடையதாக சந்தேகிக்கப்படும் மூன்று பிரான்ஸ் நாட்டவர்களை சூரிக் கன்டோனல் போலீசார் கைது செய்துள்ளனர். அதே இரவில், பின்னர் உஸ்டர் (Uster) நகரிலும் ஒரு திருட்டுசந்தேக நபரை நகர காவல்துறையினர் கைது செய்துள்ளனர்.

ஹெர்லிபெர்க் (Herrliberg) பகுதியில் உள்ள ஃபோர்ச்‌ஷ்ட்ராஸ்ஸே (Forchstrasse) வழியாக சென்ற ஒரு பிரான்ஸ் பதிவு எண்ணுடைய வாகனம், ரோந்து பணியில் இருந்த போலீசாரின் கவனத்திற்கு வந்தது. அதனை நிறுத்தி சோதனை செய்தபோது, 30 முதல் 40 வயதுக்கிடையில் உள்ள மூன்று பிரான்ஸ் நாட்டவர்களை அதிகாரிகள் விசாரித்தனர். வாகனத்தின் பின்புற இருக்கையில் தடை செய்யப்பட்ட மிளகாய் தெளிப்பான் (pepper spray) ஒன்று இருப்பது கண்டுபிடிக்கப்பட்டது.

அதனைத் தொடர்ந்து மேற்கொள்ளப்பட்ட விரிவான சோதனையில், வீட்டுத்திருட்டுக்கு பயன்படுத்தப்படும் கருவிகளும் முகமூடி உள்ளிட்ட மறைமுகப் பொருட்களும் வாகனத்தில் இருந்து கைப்பற்றப்பட்டன. இதையடுத்து, வீட்டுத்திருட்டு சம்பவங்களில் தொடர்பு இருக்கலாம் என்ற சந்தேகத்தின் அடிப்படையில் மூவரையும் சூரிக் கன்டோனல் போலீசார் கைது செய்து மேலதிக விசாரணைகளை தொடர்ந்து வருகின்றனர்.

இதே நேரத்தில், சில மணி நேரங்களுக்கு பின்னர் உஸ்டர் நகரில் தனியாக செயல்பட்டதாகக் கருதப்படும் மற்றொரு திருட்டு நபரையும் உஸ்டர் நகர காவல்துறையினர் கைது செய்தனர். சுவிட்சர்லாந்தில் சமீப காலமாக அதிகரித்து வரும் வீட்டுத்திருட்டு சம்பவங்களை கட்டுப்படுத்தும் நோக்கில் போலீசார் வாகனச் சோதனைகளை தீவிரப்படுத்தியுள்ளதாக கூறப்படுகிறது.

© Kapo ZH