பிலிப்பைன்ஸில் சிறுமிகளுக்கு எதிரான பாலியல் குற்றச்சாட்டில் சுவிஸ் நாட்டு நபர் கைது

October 7, 2025

பிலிப்பைன்ஸில் உள்ள மணிலாவின் நினாய் அக்வினோ சர்வதேச விமான நிலையத்தில், பாங்காக்கிற்குச் செல்ல தயாராக இருந்த சுவிஸ் நாட்டு நபர் ஒருவர் கைதானார். 66 வயதான அந்த நபர் சிறுமிகளுக்கு எதிராக பல்வேறு பாலியல் குற்றங்கள் செய்ததாக குற்றம் சாட்டப்பட்டுள்ளார்.

சுவிஸ் ஊடகமான Blick தெரிவித்ததின்படி, மூன்று வாரங்கள் பிலிப்பைன்ஸில் தங்கி இருந்த அந்த நபர், பாங்காக்கிற்கு புறப்படத் தயாராகியிருந்தபோது உள்ளூர் அதிகாரிகளால் தடுக்கப்பட்டார். கைது செப்டம்பர் 29 அன்று நடைபெற்றதாக பிலிப்பைன்ஸ் செய்தி ஊடகம் செய்தி வெளியிட்டுள்ளது.

குற்றச்சாட்டுகள் பற்றிய துல்லியமான விவரங்கள் இதுவரை வெளிவரவில்லை என்றாலும், அவர் சுவிட்சர்லாந்தில் ஏற்கனவே நீதித்துறைக்கு அறிமுகமான நபராக இருந்துள்ளார்.

அர்காவ் (Aargau) கன்டோன் வழக்கறிஞர் அலுவலகம், 2024 ஆம் ஆண்டில் அவருக்கு எதிராக சிறுவர் தொடர்பிலான பாலியல் காணொளிகள் (pedo-pornographic material) வைத்தல் மற்றும் பகிர்ந்தல் குற்றச்சாட்டில் வழக்குத் தொடங்கியுள்ளது. இதுவே அவரின் முதல் குற்றச்சாட்டு அல்ல — 2017 மற்றும் 2021 ஆண்டுகளிலும் இதே போன்ற குற்றச்சாட்டுகளில் தண்டிக்கப்பட்டு சிறைக்குச் சென்றதாக பதிவுகள் தெரிவிக்கின்றன.

இந்த முறை தண்டனை முடிந்த பின்னர் அவர் வெளிநாடு தப்பிச் சென்றதாக கூறப்படுகிறது. ஆனால் பிலிப்பைன்ஸ் அதிகாரிகள் இம்முறை கைது செய்தது சுவிட்சர்லாந்தில் நடந்த குற்றங்களுடன் தொடர்புடையதா என்பது இதுவரை தெளிவாகவில்லை.

சுவிஸ் வெளியுறவு துறை (DFAE) இந்த கைது சம்பவத்தை உறுதிப்படுத்தி, அந்த நபருக்கு தேவையான தூதரக உதவியை வழங்கி வருவதாக Keystone-SDA செய்தி நிறுவனம் தெரிவித்துள்ளது.

October 7, 2025