குழந்தை வளர்ப்புக்கு சம்பளம் வழங்க வேண்டும்… சுவிஸில் பரபரப்பை கிளப்பும் புதிய விவாதம்!

குழந்தை வளர்ப்புக்கு சம்பளம் வழங்க வேண்டும்… சுவிஸில் பரபரப்பை கிளப்பும் புதிய விவாதம்!

சுவிட்சர்லாந்தில் தொடர்ந்து குறைந்து வரும் பிறப்பு விகிதத்தை எப்படி உயர்த்துவது? இந்தக் கேள்விதான் தற்போது நாடு முழுவதும் பெரிய விவாதமாக மாறியுள்ளது.

பொது மக்களின் கருத்துகளை சேகரிக்கும் கலந்துரையாடலில், பல அதிரடி யோசனைகள் அதிக ஆதரவைப் பெற்று வருகின்றன. அவற்றில் முக்கியமான ஒன்று, மூன்று அல்லது அதற்கு மேற்பட்ட குழந்தைகள் உள்ள குடும்பங்களுக்கு முழுமையான வரி விலக்கு வழங்க வேண்டும் என்பதாகும். முதல் குழந்தை பிறந்ததிலிருந்தே வரிச் சலுகை வழங்க வேண்டும் என்றும் பலர் வலியுறுத்தியுள்ளனர்.

அதுமட்டுமல்ல, குழந்தைகளை வீட்டிலேயே வளர்க்கும் பெற்றோரின் உழைப்புக்கும் அரசாங்கம் நிதி மதிப்பளிக்க வேண்டும் என்ற கோரிக்கையும் வலுத்துள்ளது. ஒரு குழந்தைக்கு மாதம் ஆயிரம் சுவிஸ் பிராங்குகள் உதவித்தொகை வழங்க வேண்டும் என்ற யோசனையும் அதிக ஆதரவைப் பெற்றுள்ளது.

மேலும், பெரிய வீடுகள் குடும்பங்களுக்கு முன்னுரிமையாக வழங்கப்பட வேண்டும், குழந்தைகள் இல்லாதவர்களை விட குடும்பங்களுக்கு சலுகைகள் கிடைக்க வேண்டும் என்ற கருத்துகளும் முன்வைக்கப்பட்டுள்ளன.

இதற்கிடையில், குழந்தைகளை வளர்ப்பது ஒரு சுமை அல்ல, சமூகத்தின் எதிர்கால முதலீடு என்ற மனப்போக்கு உருவாக வேண்டும் என்றும், குடும்ப வாழ்க்கைக்கு சமூக அங்கீகாரமும் பொருளாதார ஆதரவும் ஒன்றாக வழங்கப்பட வேண்டும் என்றும் பலர் வலியுறுத்துகின்றனர்.

இந்த யோசனைகள் தற்போது பொது விவாதத்தின் ஒரு பகுதியாக மட்டுமே உள்ளன. இருப்பினும், சுவிட்சர்லாந்தின் எதிர்கால குடும்பக் கொள்கை மற்றும் பிறப்பு விகிதத்தை உயர்த்தும் முயற்சிகளில் இவை முக்கிய தாக்கத்தை ஏற்படுத்தக்கூடும் என்ற எதிர்பார்ப்பு உருவாகியுள்ளது.