சுவிஸில் ஆன்மீக சொற்பொழிவால் பக்தர்களை கவர்ந்த தமிழகரன் சனா

சுவிஸில் ஆன்மீக சொற்பொழிவால் பக்தர்களை கவர்ந்த தமிழகரன் சனா

இலங்கையின் கல்முனை மண்ணைச் சேர்ந்த இளம் ஆன்மீகச் சொற்பொழிவாளரும் சைவ சிந்தனைப் பேச்சாளருமான தமிழகரன் சனா (நாகராஜா சனாதனன்), கடந்த வார இறுதியில் சுவிட்சர்லாந்து வருகை தந்து பல்வேறு ஆலய நிகழ்வுகளில் கலந்துகொண்டு பக்தர்களுக்கு ஆன்மீகச் சொற்பொழிவுகளை வழங்கியுள்ளார்.

அண்மையில் நடைபெற்ற ஸ்ரீ விஷ்ணு துர்க்கை அம்மன் ஆலய மகோற்சவத்தில் ஆன்மீகச் சொற்பொழிவு நிகழ்த்துவதற்காக அவர் அழைக்கப்பட்டிருந்தார். எனினும், விசா அனுமதி தாமதமான காரணத்தால் திட்டமிட்ட நேரத்தில் வர முடியாமல், கடந்த வார இறுதியில் சுவிட்சர்லாந்தை வந்தடைந்தார்.

இலங்கையின் பல முக்கிய இந்து ஆலயங்களில் ஆன்மீகச் சொற்பொழிவுகள் நிகழ்த்தி, சைவ சித்தாந்தம் மற்றும் தமிழ் சமய மரபுகளை எளிமையான முறையில் பக்தர்களிடம் கொண்டு சேர்த்து வருபவராக தமிழகரன் சனா அறியப்படுகிறார். இளம் வயதிலேயே ஐரோப்பிய நாடுகளுக்கு ஆன்மீகப் பணிக்காக அழைக்கப்படும் இலங்கைச் சொற்பொழிவாளர்களில் ஒருவராக அவர் திகழ்வது குறிப்பிடத்தக்க சாதனையாகும்.

சுவிட்சர்லாந்து வருகையைத் தொடர்ந்து, கடந்த ஜூலை 24ஆம் தேதி வெள்ளிக்கிழமை ஸ்ரீ விஷ்ணு துர்க்கை அம்மன் ஆலயத்தில் நடைபெற்ற சிறப்பு நிகழ்வில் அவர் ஆற்றிய ஆன்மீகச் சொற்பொழிவு பக்தர்களின் பாராட்டைப் பெற்றது.

அதனைத் தொடர்ந்து, ஜூலை 26, 2026 அன்று சூரிச் சிவன் ஆலயத்தில் நடைபெற்ற பிரதோஷ விரத வழிபாட்டுக்குப் பின்னர் நடைபெற்ற அவரது ஆன்மீகச் சொற்பொழிவு பக்தி நிறைந்த சூழலில் மிகவும் சிறப்பாக நடைபெற்றது. சைவ சித்தாந்தம், இறைநம்பிக்கை மற்றும் தமிழ் சமயப் பாரம்பரியத்தின் முக்கியத்துவம் குறித்து அவர் ஆற்றிய உரை, ஆலயத்திற்கு வருகை தந்திருந்த பக்தர்களிடையே ஆழமான வரவேற்பைப் பெற்றதாக தெரிவிக்கப்பட்டுள்ளது.

சொற்பொழிவைத் தொடர்ந்து, அவரது பிறந்தநாளை முன்னிட்டு “அவன் அருளாலே அவன் தாள் வணங்கி” என்ற ஆன்மீக உணர்வோடு, சூரிச் சிவன் ஆலயத்தின் பிரதம குரு ஸ்ரீ கைலாசநாதர் குருக்கள், முரளி குருக்கள், ரவீந்திர குருக்கள், சைவத்தமிழ் சங்கத்தின் தலைமை ஒருங்கிணைப்பாளர் திரு. சின்னராஜா இராதாகிருஷ்ணன், சங்கத் தொண்டர்கள் மற்றும் ஆலய நிர்வாகத்தினர் இணைந்து பொன்னாடை போர்த்தி தமிழகரன் சனா அவர்களை கௌரவித்தனர்.

நிகழ்வில் கலந்து கொண்ட ஏராளமான சிவபக்தர்களும் அவருக்கு பிறந்தநாள் வாழ்த்துகளைத் தெரிவித்து, அவர் தொடர்ந்து ஆன்மீகப் பணியில் சிறந்து விளங்கவும், சைவ சமயத்தின் உயரிய சிந்தனைகளை உலகெங்கும் பரப்பும் பணியில் மேலும் பல வெற்றிகளைப் பெறவும் இறைவனின் அருளாசி கிடைக்க பிரார்த்தனை செய்தனர்.

இளம் தலைமுறையினரிடம் சைவ சித்தாந்தம், தமிழ் சமய மரபுகள் மற்றும் ஆன்மீக விழிப்புணர்வை கொண்டு சேர்க்கும் பணியில் தமிழகரன் சனா தொடர்ந்து ஈடுபட்டு வருகிறார். அவரது இந்தப் பயணம், வெளிநாடுகளில் வாழும் தமிழர்களிடையே ஆன்மீக விழிப்புணர்வை வலுப்படுத்தும் முயற்சியாகவும் பார்க்கப்படுகிறது.