ஹுன்சென்ஷ்வில் (Hunzenschwil) பகுதியில் குழந்தைகளிடம் பேசிய மர்மநபர் கைது

ஹுன்சென்ஷ்வில் (Hunzenschwil) பகுதியில் குழந்தைகளிடம் பேசிய மர்மநபர் கைது

ஆர்காவ் (Aargau) கன்டோனிலுள்ள ஹுன்சென்ஷ்வில் (Hunzenschwil) பகுதியில் குழந்தைகளிடம் சந்தேகத்திற்கிடமாக பேசியதாக கூறப்பட்ட சம்பவம் கடந்த வாரம் பள்ளி மற்றும் கிராம மக்களிடையே அச்சத்தை ஏற்படுத்திய நிலையில், சந்தேகநபரை போலீசார் கைது செய்துள்ளனர்.

கடந்த வாரம், பள்ளியிலிருந்து வீடு திரும்பிக் கொண்டிருந்த தனது மகளிடம் அடையாளம் தெரியாத வயது வந்த நபர் ஒருவர் பேசியதாக கவலையடைந்த தாய் ஒருவர் ஆர்காவ் கன்டோனல் போலீசாரிடம் புகார் அளித்தார். அதனைத் தொடர்ந்து ஹுன்சென்ஷ்வில் பகுதியில் இருந்து இதேபோன்ற மேலும் பல தகவல்கள் குறுகிய நேரத்திலேயே கிடைத்ததாக தெரிவிக்கப்பட்டுள்ளது.

இந்த சம்பவங்கள் குறித்து தகவல்கள் பள்ளியில் வேகமாக பரவியதுடன், முழு கிராமத்திலும் பெரும் பதற்றம் ஏற்பட்டது. இதையடுத்து போலீசார் அப்பகுதியில் கூடுதல் கண்காணிப்பு மற்றும் ரோந்து நடவடிக்கைகளை மேற்கொண்டனர்.

குழந்தைகள் வழங்கிய குறிப்பான தகவல்களின் அடிப்படையில், ஆரம்பத்திலிருந்தே ஆர்காவ் கன்டோனல் போலீசார் தீவிர விசாரணை மற்றும் தேடுதல் நடவடிக்கைகளை முன்னெடுத்தனர். இருப்பினும் ஆரம்பத்தில் அந்த மர்மநபரின் அடையாளத்தை உறுதிப்படுத்த முடியவில்லை.

பின்னர் மே 28ஆம் திகதி வியாழக்கிழமை பிற்பகல், ஓபரென்ட்ஃபெல்டன் (Oberentfelden) பகுதியில் இருந்து கிடைத்த புதிய தகவல், ஹுன்சென்ஷ்வில் சம்பவங்களுடன் தொடர்பிருக்கலாம் என போலீசார் சந்தேகித்தனர்.

இதையடுத்து மேற்கொள்ளப்பட்ட தீவிர தேடுதல் நடவடிக்கையின் போது, காரில் தப்பிச் செல்ல முயன்ற நிலையில் சந்தேகநபர் கைது செய்யப்பட்டார்.

31 வயதுடைய சுவிஸ் நபரான அவர் மீது கடுமையான சந்தேகம் இருப்பதாக தெரிவிக்கப்பட்டுள்ளது. தற்போது அவர் காவலில் வைக்கப்பட்டுள்ளார். சம்பவத்தின் பின்னணி மற்றும் நோக்கம் குறித்து இன்னும் தெளிவாக தெரியவில்லை.

இந்த வழக்கில் லென்ஸ்புர்க்-ஆராவ் (Lenzburg-Aarau) அரசுத் தரப்பு வழக்கறிஞர் அலுவலகம் குற்றவியல் விசாரணையை ஆரம்பித்துள்ளதுடன், ஆர்காவ் கன்டோனல் போலீசார் மேலதிக விசாரணைகளை தொடர்ந்து மேற்கொண்டு வருகின்றனர்.

மூலம்: ஆர்காவ் கன்டோனல் போலீசார்