உலகின் மிக அதிக செலவான நாடு என்ற இடத்தை இழந்த சுவிட்சர்லாந்து

உலகின் மிக அதிக செலவான நாடு என்ற இடத்தை இழந்த சுவிட்சர்லாந்து

பல ஆண்டுகளாக உலகின் மிக அதிக வாழ்க்கைச் செலவுடைய நாடாக கருதப்பட்ட சுவிட்சர்லாந்து தற்போது அந்த இடத்தை இழந்துள்ளது. புதிய ஆய்வின் படி, தற்போது ஐஸ்லாந்து (Iceland) உலகின் மிக அதிக செலவான நாடாக மாறியுள்ளது.

ஐஸ்லாந்தில் மேற்கொள்ளப்பட்ட ஆய்வின் அடிப்படையில், அந்நாட்டின் வாழ்க்கைச் செலவு தற்போது சுவிட்சர்லாந்தை விட சுமார் 3 சதவீதம் அதிகமாக உள்ளதாக தெரிவிக்கப்பட்டுள்ளது.

2024ஆம் ஆண்டில் கூட சுவிட்சர்லாந்தின் விலைகள் ஐஸ்லாந்தை விட சராசரியாக 7 சதவீதம் அதிகமாக இருந்ததாக தரவுகள் காட்டுகின்றன. ஆனால் கடந்த சில மாதங்களில் ஏற்பட்ட பணவீக்க மாற்றங்கள் இந்த நிலையை மாற்றியுள்ளன.

2024 செப்டம்பர் மாதத்திலிருந்து சுவிட்சர்லாந்தின் பணவீக்க விகிதம் 1 சதவீதத்தைத் தாண்டாத நிலையில் தொடர்கிறது. அதேவேளை, ஐஸ்லாந்தில் பணவீக்கம் 3.7 சதவீதத்திற்குக் கீழ் குறையாமல் இருந்து வருகிறது. இதுவே அந்நாட்டின் வாழ்க்கைச் செலவை வேகமாக உயர்த்திய முக்கிய காரணமாக பார்க்கப்படுகிறது.

பொருளாதார நிபுணர்களின் கருத்துப்படி, சுற்றுலாத்துறை வளர்ச்சி, வீட்டு வாடகை உயர்வு மற்றும் சேவைத் துறைகளின் விலை அதிகரிப்பு ஆகியவை ஐஸ்லாந்தில் செலவுகளை மேலும் உயர்த்தியுள்ளன.

இதற்கிடையில், சுவிட்சர்லாந்து இன்னும் உலகின் மிகவும் உயர்ந்த செலவுடைய நாடுகளில் ஒன்றாகவே தொடர்கிறது. குறிப்பாக வீட்டு வசதி, சுகாதாரம் மற்றும் அன்றாட சேவைகளின் விலைகள் இன்னும் பல ஐரோப்பிய நாடுகளை விட அதிகமாக உள்ளன.