நோஷாட்டல் ஏரியில் 2000 ஆண்டு பழமையான ரோமர் காலப் பொருட்கள் கண்டுபிடிப்பு

நோஷாட்டல் ஏரியில் 2000 ஆண்டு பழமையான ரோமர் காலப் பொருட்கள் கண்டுபிடிப்பு

சுவிட்சர்லாந்தின் Lake Neuchâtel பகுதியில் மேற்கொள்ளப்பட்ட நீர்மூழ்கி தொல்லியல் ஆய்வின்போது, சுமார் 2000 ஆண்டுகள் பழமையான Roman Empire காலத்தைச் சேர்ந்த அரிய பொருட்கள் பெருமளவில் கண்டுபிடிக்கப்பட்டுள்ளன.

இந்த ஆய்வின் மூலம் நீருக்கடியில் இருந்து சுமார் 1,200 பொருட்கள் மீட்கப்பட்டுள்ளதாக ஆய்வாளர்கள் தெரிவித்துள்ளனர். அவற்றில் மண் பானைகள், ஆயுதங்கள், வேலைப்பாடுகளுக்கான கருவிகள் மற்றும் குதிரை வண்டிகளின் உதிரிப்பாகங்கள் போன்றவை அடங்குகின்றன.

குறிப்பாக, மூன்று வாள்கள் கண்டுபிடிக்கப்பட்டுள்ளன. அவற்றில் ஒன்று இன்னும் தோலால் செய்யப்பட்ட உறையுடன் பாதுகாப்பாக இருந்தது என்பதும் குறிப்பிடத்தக்கது. மேலும், ஸ்பெயின் பகுதியில் இருந்து வந்ததாக கருதப்படும் Amphorae எனப்படும் எண்ணெய் மற்றும் திரவப் பொருட்களை சேமிக்கும் குடுவைகளும் கண்டுபிடிக்கப்பட்டுள்ளன. இது மத்தியதரைக் கடல் வழியாக ரோமப் படைகளுக்கு பொருட்கள் வர்த்தகமாக கொண்டுவரப்பட்டதை உறுதிப்படுத்தும் முக்கிய ஆதாரமாக கருதப்படுகிறது.

இந்த பொருட்கள், அக்காலத்தில் ரோமப் படைகள் தங்கியிருந்த Vindonissa என்ற முக்கிய இராணுவத் தளத்திற்கு அனுப்பப்பட்டிருக்கலாம் என நிபுணர்கள் கருதுகின்றனர். அங்கு 13-வது லெஜியன் படையினர் வடக்கு எல்லைப் பாதுகாப்பில் ஈடுபட்டிருந்தனர் என்பது வரலாற்றில் பதிவாகியுள்ளது.

இந்த புதிய கண்டுபிடிப்புகள், ரோமப் பேரரசின் வர்த்தக மற்றும் போக்குவரத்து அமைப்புகள் எவ்வளவு விரிவாக செயல்பட்டன என்பதை வெளிப்படுத்துவதுடன், ஆல்ப்ஸ் மலைகளின் வடக்குப் பகுதிகளிலும் ரோமர் தாக்கம் பரவலாக இருந்ததை உறுதிப்படுத்துகின்றன. இந்த ஆய்வு, சுவிட்சர்லாந்தின் பழங்கால வரலாற்றை மேலும் தெளிவுபடுத்தும் முக்கிய முன்னேற்றமாக பார்க்கப்படுகிறது.