மத்திய கிழக்கு பயணங்கள் மீண்டும் ஒத்திவைப்பு: SWISS அறிவிப்பு

மத்திய கிழக்கு பயணங்கள் மீண்டும் ஒத்திவைப்பு: SWISS அறிவிப்பு

சுவிட்சர்லாந்தின் தேசிய விமான சேவையான SWISS International Air Lines மத்திய கிழக்கு பகுதிகளுக்கான சில விமான சேவைகளை மீண்டும் ஒத்திவைத்துள்ளதாக அறிவித்துள்ளது. அந்நிறுவனம் திங்கட்கிழமை வெளியிட்ட செய்திக் குறிப்பில், மத்திய கிழக்கில் தொடரும் பதற்றமான நிலைமையை கருத்தில் கொண்டு Dubai நகரத்திற்கான விமான சேவைகள் மார்ச் 15 ஆம் தேதி வரை நிறுத்தப்பட்டிருக்கும் என்று தெரிவித்துள்ளது.

அதேபோல் Tel Aviv நகரத்திற்கான விமான சேவைகளும் ஏப்ரல் 2 ஆம் தேதி வரை இடைநிறுத்தப்பட்டே இருக்கும் என்று நிறுவனம் கூறியுள்ளது.

நிலவரத்தை தொடர்ந்து மதிப்பாய்வு செய்து கொண்டு இருப்பதாகவும், விமான ஊழியர்கள் மற்றும் பயணிகளின் பாதுகாப்பே எப்போதும் மிக உயர்ந்த முன்னுரிமையாக கருதப்படுவதாகவும் SWISS நிறுவனம் விளக்கியுள்ளது. தற்போதைய பாதுகாப்பு சூழ்நிலையை கருத்தில் கொண்டு இந்த சேவைகளை தற்காலிகமாக மேலும் நிறுத்தி வைக்க முடிவு செய்துள்ளதாகவும் நிறுவனம் தெரிவித்துள்ளது.

மத்திய கிழக்கு பிராந்தியத்தில் கடந்த மாதங்களில் பாதுகாப்பு தொடர்பான பதற்றம் அதிகரித்துள்ளதால், பல சர்வதேச விமான நிறுவனங்கள் தங்களது விமான சேவைகளை மறுசீரமைத்து வருகின்றன. அதே நிலையை கருத்தில் கொண்டு SWISS நிறுவனமும் தனது விமான அட்டவணையில் மாற்றங்களை மேற்கொண்டுள்ளது.

சுவிட்சர்லாந்திலிருந்து மத்திய கிழக்கு பகுதிகளுக்கு பயணிக்கும் பயணிகள், விமான சேவை மாற்றங்கள் குறித்து தங்களது முன்பதிவு விவரங்களை முன்கூட்டியே சரிபார்க்குமாறு விமான நிறுவனம் அறிவுறுத்தியுள்ளது. தற்போதைய சூழ்நிலையை பொறுத்து இந்த சேவைகள் மீண்டும் எப்போது தொடங்கும் என்பது குறித்து பின்னர் அறிவிக்கப்படும் என்றும் தெரிவிக்கப்பட்டுள்ளது.

© KeystoneSDA