ஜெனீவாவில் சைக்கிள் வாடகை திட்டம் அதிரடி வெற்றி – விரிவாக்கத் திட்டம் விரைவில்

ஜெனீவாவில் சைக்கிள் வாடகை திட்டம் அதிரடி வெற்றி – விரிவாக்கத் திட்டம் விரைவில்

ஜெனீவாவில் தொடங்கப்பட்ட சைக்கிள் வாடகை திட்டம் மக்கள் மத்தியில் மிகப்பெரிய வரவேற்பைப் பெற்றுள்ளது. இதனால், அத்திட்டத்தை மேலும் விரிவுபடுத்தும் முயற்சிகள் தீவிரமாக முன்னெடுக்கப்படுகின்றன.

இந்த திட்டத்தை தற்போது டேன்மார்க் நாட்டைச் சேர்ந்த Donkey Republic நிறுவனம் செயல்படுத்தி வருகிறது. தற்போது 1,700 சைக்கிள்கள் சேவையில் உள்ளன; ஆண்டு முடிவிற்கு முன் இந்த எண்ணிக்கை 2,000 ஆக உயர்த்தப்படும் என்று அறிவிக்கப்பட்டுள்ளது.

கடந்த ஆண்டில் மட்டும் சுமார் 39,000 பயணங்கள் இந்த சைக்கிள்கள் மூலம் மேற்கொள்ளப்பட்டுள்ளன. இதில் பாதி பயணிகள் ஜெனீவா நகர மக்களே. குறிப்பாக, 2020ஆம் ஆண்டிலிருந்து பயன்பாடு 1,000% உயர்வு கண்டுள்ளது என்பதே இந்தத் திட்டத்தின் அதிரடி வளர்ச்சியை வெளிப்படுத்துகிறது.

முக்கியமாக, இந்த திட்டம் இனி ஜெனீவா மாகாணத்தைத் தாண்டி, வாட் (Vaud) மற்றும் அண்டை பிரான்ஸ் பகுதிகளுக்கும் விரிவடைய வாய்ப்பு உள்ளது என்று அதிகாரிகள் தெரிவித்துள்ளனர்.

ஜெனீவாவின் சைக்கிள் வாடகை முயற்சி, போக்குவரத்துக்கான சுற்றுச்சூழல் நட்பு மாற்று வழியாய் மட்டுமல்லாமல், மக்களின் வாழ்க்கை முறையிலும் பெரிய மாற்றத்தை ஏற்படுத்தும் என்று எதிர்பார்க்கப்படுகிறது.

@WRS