லூசேர்னில் குடல் புற்றுநோய் தடுப்பு திட்ட தொலைபேசி எண்ணை பயன்படுத்தி மோசடி முயற்சி

லூசேர்னில் குடல் புற்றுநோய் தடுப்பு திட்ட தொலைபேசி எண்ணை பயன்படுத்தி மோசடி முயற்சி

சுவிட்சர்லாந்தின் லூசேர்ன் கன்டோனில் செயல்படும் அரசின் குடல் புற்றுநோய் முன்தடுப்பு திட்டத்தின் தொலைபேசி எண்ணை பயன்படுத்தி தொலைபேசி மோசடி முயற்சிகள் நடைபெற்று வருவது கண்டறியப்பட்டுள்ளது. இந்த சம்பவத்தை தொடர்ந்து, உடனடி பாதுகாப்பு நடவடிக்கைகள் மேற்கொள்ளப்பட்டுள்ளதுடன், பாதிக்கப்பட்டவர்கள் உரிய அலுவலகங்கள் அல்லது போலீசாரை தொடர்புகொள்ளுமாறு அதிகாரிகள் கேட்டுக்கொண்டுள்ளனர்.

லூசேர்ன் கன்டோனின் சுகாதாரம் மற்றும் விளையாட்டு துறை நிர்வகிக்கும் குடல் புற்றுநோய் தடுப்பு திட்டத்தின் அதிகாரப்பூர்வ தொலைபேசி எண் 041 228 70 00 தற்போது மோசடி நோக்கில் தவறாக பயன்படுத்தப்படுகிறது. இந்த அழைப்புகளில், சந்தேகிக்கப்படும் மோசடியாளர்கள் தங்களை Luzerner Kantonalbank (LUKB) ஊழியர்களாக அறிமுகப்படுத்திக் கொண்டு, பணம் செலுத்துமாறு கோருகின்றனர். அதிகாரிகள் இது தெளிவான மோசடி செயல் என உறுதிப்படுத்தியுள்ளனர்.

இந்த நிலைமைக்கு உடனடி தீர்வாக, குறித்த தொலைபேசி எண்ணில் அழைப்பவர்களுக்கு மோசடி குறித்து எச்சரிக்கும் குரல் செய்தி ஒலிக்கச் செய்யப்பட்டுள்ளது. அதேபோல் லூசேர்ன் கன்டோனின் சுகாதாரம் மற்றும் விளையாட்டு துறை மற்றும் குடல் புற்றுநோய் முன்தடுப்பு திட்டத்தின் அதிகாரப்பூர்வ இணையதளங்களிலும் மோசடி எச்சரிக்கை அறிவிப்பு வெளியிடப்பட்டுள்ளது.

லூசேர்ன் கன்டோனின் சுகாதாரம் மற்றும் விளையாட்டு துறை நிர்வாகம் வெளியிட்டுள்ள விளக்கத்தில், கன்டோனல் குடல் புற்றுநோய் தடுப்பு திட்ட மையம் எந்நேரத்திலும் பொதுமக்களை அழைத்து பணம் கோராது என தெளிவுபடுத்தப்பட்டுள்ளது. எனவே, இத்தகைய அழைப்புகள் வந்தால் உடனடியாக அழைப்பை நிறுத்தி, தனிப்பட்ட தகவல்கள், வங்கி விவரங்கள் அல்லது பணம் தொடர்பான எந்த தகவலையும் வழங்க வேண்டாம் என அறிவுறுத்தப்பட்டுள்ளது. மேலும், இந்த வகை தொலைபேசி மோசடிகள் குறித்து குடும்பத்தினர் மற்றும் நண்பர்களிடமும் விழிப்புணர்வு ஏற்படுத்துமாறு கேட்டுக்கொள்ளப்பட்டுள்ளது.

ஏற்கனவே பணம் செலுத்தியிருந்தாலோ அல்லது வங்கி விவரங்களை பகிர்ந்திருந்தாலோ, உடனடியாக தங்களது வங்கி அல்லது சம்பந்தப்பட்ட நிதி நிறுவனத்தை தொடர்புகொண்டு கணக்குகள் மற்றும் வங்கி அட்டைகளை முடக்க வேண்டும் என தெரிவிக்கப்பட்டுள்ளது. இதன் பின்னர் அருகிலுள்ள காவல் நிலையம் அல்லது Luzerner Polizei  தொடர்புகொள்ள வேண்டும் என அதிகாரிகள் கூறுகின்றனர்.

மோசடி முயற்சிகள் இருந்தாலும், குடல் புற்றுநோய் தடுப்பு திட்டத்தின் சேவைகளில் எந்தத் தடையும் இல்லை என்றும், 041 228 70 00 என்ற எண்ணின் மூலம் வழக்கம்போல் திட்ட மையத்தை தொடர்புகொள்ள முடியும் என்றும் DIGE உறுதி செய்துள்ளது. பொதுமக்கள் எச்சரிக்கையுடன் இருக்க வேண்டும் என்பதே அதிகாரிகளின் முக்கிய வேண்டுகோளாக உள்ளது.

© Kapo Lu