புகலிடக்கோரிக்கை விதிகளை கடுமையாக்கும் சுவிட்சர்லாந்து

புகலிடக்கோரிக்கை விதிகளை கடுமையாக்கும் சுவிட்சர்லாந்து

சுவிட்சர்லாந்தில் புகலிடக்கோரிக்கை விதிகளை மேலும் கடுமையாக்கும் நோக்கில் புதிய அரசியல் நடவடிக்கைகள் முன்னெடுக்கப்பட்டு வருகின்றன. புகலிடக் கோரிக்கையாளர்களின் எண்ணிக்கையை கட்டுப்படுத்தவும், அவர்களுடன் தொடர்புடைய அரசுச் செலவுகளை குறைக்கவும் நோக்கமுடைய ஒரு புதிய கொள்கை முன்மொழிவு தற்போது நாடாளுமன்றத்தில் முன்னேறியுள்ளது.

இந்த முன்மொழிவை சுவிஸ் மக்கள் கட்சி (SVP) முன்வைத்துள்ளது. அதன் படி, சுவிட்சர்லாந்தில் புகலிடம் கோரியுள்ளவர்களின் குடும்ப உறுப்பினர்கள் பின்னர் அவர்களுடன் சேர்ந்து நாட்டுக்குள் வருவதை கடுமையாக கட்டுப்படுத்தும் விதமான புதிய விதிமுறைகளை ஃபெடரல் அரசு உருவாக்க வேண்டும் என கோரப்பட்டுள்ளது.

அதே நேரத்தில், நாட்டில் சமீப ஆண்டுகளில் அதிகரித்துவரும் புகலிடக் கோரிக்கைகளின் எண்ணிக்கையை குறைக்கும் நடவடிக்கைகள் மேற்கொள்ளப்பட வேண்டும் என்றும், புகலிடக்கோரிக்கையாளர்களுக்காக அரசு செலவிடும் நிதியையும் கட்டுப்படுத்த வேண்டும் என்றும் அந்த மசோதாவில் குறிப்பிடப்பட்டுள்ளது. மேலும், புகலிடக் கோரிக்கையாளர்கள் குற்றச்செயல்களில் ஈடுபடுவதைத் தடுக்கும் வகையில் கூடுதல் பாதுகாப்பு மற்றும் கண்காணிப்பு நடவடிக்கைகள் தேவை என்றும் அதில் வலியுறுத்தப்பட்டுள்ளது.

இந்த முன்மொழிவு சுவிட்சர்லாந்து நாடாளுமன்றத்தின் கீழவை (Nationalrat) யில் ஏற்கனவே நிறைவேற்றப்பட்டுள்ளது. இதனால், சட்டமாக அமலுக்கு வருவதற்கான அடுத்த கட்டமாக அது மேலவை (Ständerat) யின் ஒப்புதலை பெற வேண்டியுள்ளது.

சுவிட்சர்லாந்தில் குடியேற்றம் மற்றும் புகலிடக் கொள்கைகள் குறித்து அரசியல் விவாதங்கள் கடந்த சில ஆண்டுகளாக அதிகரித்து வருகின்றன. குறிப்பாக ஐரோப்பாவுக்கு அதிகரித்துவரும் குடியேற்ற அழுத்தங்களும், சமூக மற்றும் பொருளாதாரச் சவால்களும் இந்த விவகாரத்தை அரசியல் ரீதியாக முக்கியமானதாக மாற்றியுள்ளன.

இந்த புதிய மசோதா மேலவையிலும் நிறைவேற்றப்பட்டால், சுவிட்சர்லாந்தின் புகலிடக் கொள்கையில் குறிப்பிடத்தக்க மாற்றங்கள் அமலுக்கு வரக்கூடும் என அரசியல் வட்டாரங்கள் தெரிவித்துள்ளன.