GoDaddy பெயரில் வரும் போலி மின்னஞ்சல்கள்: இணைய மோசடி குறித்து எச்சரிக்கை

GoDaddy பெயரில் வரும் போலி மின்னஞ்சல்கள்: இணைய மோசடி குறித்து எச்சரிக்கை

GoDaddy நிறுவனத்தின் பெயரை பயன்படுத்தி அனுப்பப்படும் போலி மின்னஞ்சல்கள் மூலம் சைபர் குற்றவாளிகள் இணைய பயனர்களை ஏமாற்ற முயற்சித்து வருவதாக சுவிட்சர்லாந்து சைபர் குற்றப்பிரிவு எச்சரிக்கை விடுத்துள்ளது. இந்த மின்னஞ்சல்கள், GoDaddy என்ற டொமைன் மற்றும் ஹோஸ்டிங் சேவை வழங்குநரிடமிருந்து வந்ததுபோல் தோற்றமளித்து, பெறுபவர்களின் உள்நுழைவு விவரங்கள் மற்றும் கட்டண தகவல்களை திருடுவதே இவர்களின் நோக்கமாக உள்ளது.

இந்த மோசடி மின்னஞ்சல்களில், GoDaddy சேவையின் புதுப்பிப்பு நிராகரிக்கப்பட்ட கட்டண முறையால் நிறைவேற்றப்படவில்லை என கூறப்படுகிறது. மேலும், 24 மணி நேரத்திற்குள் கட்டண விவரங்களை புதுப்பிக்காவிட்டால் சம்பந்தப்பட்ட சேவைகள் தடை செய்யப்படும் என எச்சரிக்கை விடுத்து, பெறுபவர்களை அவசர முடிவெடுக்க வைக்கும் முயற்சி மேற்கொள்ளப்படுகிறது.

அந்த மின்னஞ்சலில் “கட்டணத்தை புதுப்பிக்கவும்” போன்ற பொத்தான்கள் இடம் பெற்றிருக்கும். அவற்றை கிளிக் செய்தால், GoDaddy வாடிக்கையாளர் போர்ட்டலைப் போலவே தோற்றமளிக்கும் ஒரு போலி இணையதளத்திற்கு பயனர்கள் அழைத்துச் செல்லப்படுவார்கள். அங்கு உள்நுழைவு விவரங்கள் மற்றும் கிரெடிட் கார்டு தகவல்களை உள்ளிடுமாறு கேட்டுக் கொள்ளப்படுகிறது.

இந்த தகவல்களை பயனர்கள் உள்ளிட்டவுடன், சைபர் குற்றவாளிகள் அந்த GoDaddy கணக்கில் முழு அணுகலை பெற்றுக்கொண்டு, அனுமதியில்லாத பண பரிவர்த்தனைகளை மேற்கொள்கிறார்கள். மேலும், இரட்டை பாதுகாப்பு முறைகளை (Two-Factor Authentication) மீறுவதற்காக, SMS மூலம் வரும் பாதுகாப்பு குறியீடையும் கேட்கும் அளவிற்கு இந்த மோசடி செயல்கள் விரிவடைந்துள்ளதாக தெரிவிக்கப்பட்டுள்ளது.

இந்த நிலையில், இத்தகைய சந்தேகமான மின்னஞ்சல்களை Cybercrimepolice.ch என்ற இணையதளத்திற்கு அனுப்பி தெரிவிக்குமாறு பொதுமக்களுக்கு அறிவுறுத்தப்பட்டுள்ளது. மேலும், அந்த மின்னஞ்சல்களை பொருட்படுத்தாமல் நீக்கவோ அல்லது ஸ்பாம் கோப்புறையில் இடமாற்றம் செய்யவோ வேண்டும் என்றும், மின்னஞ்சல் அல்லது குறுஞ்செய்திகளில் வரும் இணைப்புகளை ஒருபோதும் திறக்கக்கூடாது என்றும் எச்சரிக்கை விடுக்கப்பட்டுள்ளது.

முன்னதாக சரியான உறுதிப்படுத்தல் இல்லாமல் எந்தச் சூழலிலும் தனிப்பட்ட அல்லது நிதி தொடர்பான தகவல்களை பகிரக்கூடாது என்றும், சந்தேகம் ஏற்பட்டால் நேரடியாக அந்த நிறுவனத்தை தொடர்பு கொண்டு மின்னஞ்சலின் உண்மைத்தன்மையை உறுதி செய்ய வேண்டும் என்றும் அதிகாரிகள் அறிவுறுத்துகின்றனர்.

யாராவது தங்களின் தகவல்களை தவறுதலாக வழங்கியிருந்தால், உடனடியாக தங்களின் வங்கி அல்லது நிதி நிறுவனத்தை தொடர்பு கொண்டு சம்பந்தப்பட்ட வங்கி அல்லது டெபிட் கார்டுகளை முடக்க வேண்டும். அதேபோல், GoDaddy கணக்கின் கடவுச்சொல்லையும், அதே உள்நுழைவு விவரங்களை பயன்படுத்தும் பிற கணக்குகளின் கடவுச்சொற்களையும் உடனடியாக மாற்ற வேண்டும். பின்னர், முன்பதிவு செய்து அருகிலுள்ள கன்டோனல் காவல் நிலையத்தில் புகார் அளிக்குமாறு அறிவுறுத்தப்பட்டுள்ளது.

மூலம்: Cybercrimepolice.ch