குழந்தை கண்காணிப்பு சாதனங்கள் பெற்றோரின் பதற்றத்தை குறைப்பதில்லை: ஆய்வு
குழந்தை கண்காணிப்பு சாதனங்கள் பெற்றோரின் பதற்றத்தை குறைப்பதில்லை: ஆய்வு
குழந்தைகளின் பாதுகாப்புக்காக பெற்றோர்களை நிம்மதிப்படுத்தும் நோக்கில் உருவாக்கப்பட்ட கேமரா கொண்ட பேபி மானிட்டர்கள், சென்சார் மெத்தைகள், ஆக்சிஜன் அளவை கண்காணிக்கும் ஸ்மார்ட் சாக்ஸ் போன்ற சாதனங்கள், உண்மையில் அதற்கு எதிரான விளைவையே ஏற்படுத்துகின்றன என்று ஒரு புதிய ஆய்வு தெரிவிக்கிறது.
University of Lausanne-இல் மேற்கொள்ளப்பட்ட இந்த ஆய்வின் படி, இத்தகைய டிஜிட்டல் கண்காணிப்பு கருவிகள் பெற்றோரின் கவலை மற்றும் மனஅழுத்தத்தை குறைப்பதற்கு பதிலாக அதிகரிக்கச் செய்கின்றன. குறிப்பாக, குழந்தைகளின் திடீர் மரணம் (Sudden Infant Death Syndrome – SIDS) குறித்த அச்சம் பல பெற்றோரிடமும் பரவலாக இருப்பதாக ஆய்வு கூறுகிறது.
இந்த ஆய்வை நடத்திய சுகாதார உளவியலாளர் Chloé Michoud, குழந்தை பாதுகாப்பு தொடர்பான பயங்கள், தொழில்நுட்பத்தை “ஆபத்தை கட்டுப்படுத்தும் ஒரு கருவி”யாகவும், தங்களை பொறுப்பான பெற்றோர்கள் என நிரூபிக்கும் ஒரு வழியாகவும் பயன்படுத்தச் செய்கின்றன என விளக்குகிறார். தொடர்ந்து வரும் அலாரங்கள் மற்றும் தரவுகள், பெற்றோர்களை அமைதிப்படுத்தாமல், எப்போதும் கவலையுடன் இருக்கச் செய்கின்றன என்றும் அவர் சுட்டிக்காட்டுகிறார்.
இதற்கிடையில், சுவிட்சர்லாந்து குழந்தை மருத்துவர்கள், இவ்வகை கண்காணிப்பு சாதனங்கள் மருத்துவ ரீதியாக பரிந்துரைக்கப்படுவதில்லை என்று வலியுறுத்துகின்றனர். அவை தவறான எச்சரிக்கைகளை ஏற்படுத்தி, தேவையற்ற பதற்றத்தையும் குழப்பத்தையும் உருவாக்கும் அபாயம் இருப்பதாகவும் அவர்கள் எச்சரிக்கின்றனர்.
குழந்தைகளின் பாதுகாப்பிற்காக, தொடர்ந்து டிஜிட்டல் கண்காணிப்பில் ஈடுபடுவதற்குப் பதிலாக, மருத்துவ ரீதியாக நிரூபிக்கப்பட்ட பாதுகாப்பு வழிமுறைகளைப் பின்பற்றுவதே சிறந்தது என குழந்தை மருத்துவர்கள் அறிவுறுத்துகின்றனர். சரியான தூக்க நிலை, புகைபிடிப்பை தவிர்ப்பது, பாதுகாப்பான தூக்க சூழல் போன்ற அடிப்படை முன்னெச்சரிக்கைகளே உண்மையான பாதுகாப்பை வழங்கும் என்பதையும் அவர்கள் நினைவூட்டுகின்றனர்.
