க்ரான்ஸ்-மொன்டானா புத்தாண்டு தீ விபத்து : மேலும் 16 பேர் அடையாளம் காணப்பட்டனர்

க்ரான்ஸ்-மொன்டானா புத்தாண்டு தீ விபத்து: மேலும் 16 பேர் அடையாளம் காணப்பட்டனர்

சுவிட்சர்லாந்தின் க்ரான்ஸ்-மொன்டானா நகரில் புத்தாண்டு இரவில் ஏற்பட்ட பயங்கர தீ விபத்து தொடர்பாக மேலும் 16 உயிரிழந்தவர்களின் அடையாளம் உறுதிப்படுத்தப்பட்டுள்ளதாக வலைஸ் கன்டோனல் போலீசார் தெரிவித்துள்ளனர். இவர்களின் உடல்கள் சட்ட நடைமுறைகளுக்குப் பிறகு குடும்பத்தினரிடம் ஒப்படைக்கப்பட்டுள்ளன.

2026 ஜனவரி 1 ஆம் தேதி அதிகாலை “லே கான்ஸ்டெல்லேஷன்” என்ற பாரில் ஏற்பட்ட இந்த தீ விபத்தில் உயிரிழந்தவர்களை அடையாளம் காணும் பணிகள், வலைஸ் கன்டோனல் போலீசார், பேரழிவு பாதிக்கப்பட்டோர் அடையாள குழு (DVI) மற்றும் சட்ட மருத்துவ நிறுவனம் ஆகியவற்றின் ஒருங்கிணைப்பில் மேற்கொள்ளப்பட்டு வருகின்றன. அந்தப் பணியின் ஒரு பகுதியாக மேலும் நான்கு பேரின் அடையாளங்கள் சமீபத்தில் உறுதி செய்யப்பட்டுள்ளன.

இதுவரை அடையாளம் காணப்பட்டவர்களில் நான்கு சுவிஸ் நாட்டுப் பெண்கள் உள்ளனர். இவர்களில் ஒருவர் 18 வயதையும், இருவர் 15 வயதையும், மற்றொருவர் 14 வயதையும் சேர்ந்தவர்கள். அதேபோல், 31, 20, 18, 17 மற்றும் இருவர் 16 வயதுடைய ஆறு சுவிஸ் ஆண்களும் உயிரிழந்துள்ளனர். கூடுதலாக, 16 வயதுடைய இரண்டு இத்தாலியர்கள், 16 வயதுடைய இத்தாலிய-எமிரேட்ஸ் இரட்டை குடியுரிமையாளர் ஒருவர், 18 வயதுடைய ருமேனியர் ஒருவர், 39 வயதுடைய பிரெஞ்சு குடியுரிமையாளர் ஒருவர் மற்றும் 18 வயதுடைய துருக்கியர் ஒருவர் இந்த விபத்தில் உயிரிழந்துள்ளனர்.

இந்த நிலையில், இதுவரை மொத்தம் 24 உயிரிழந்தவர்களின் அடையாளங்கள் உறுதி செய்யப்பட்டுள்ளன. மீதமுள்ள உயிரிழந்தவர்கள் மற்றும் காயமடைந்தவர்கள் தொடர்பான அடையாளம் காணும் பணிகள் தொடர்ந்து நடைபெற்று வருவதாக அதிகாரிகள் தெரிவித்துள்ளனர். புதிய தகவல்கள் கிடைக்கும் போதெல்லாம் பொதுமக்களுக்கு அறிவிக்கப்படும் என்றும் வலைஸ் கன்டோனல் போலீசார் கூறியுள்ளனர்.

உயிரிழந்தவர்களின் குடும்பத்தினரின் துயரத்தை கருத்தில் கொண்டு, இந்த கட்டத்தில் கூடுதல் விவரங்களை வெளியிட முடியாது என்றும் அதிகாரிகள் தெரிவித்துள்ளனர். இந்த சம்பவம் சுவிட்சர்லாந்து முழுவதும் பெரும் அதிர்ச்சியையும், துக்கத்தையும் ஏற்படுத்தியுள்ள நிலையில், தீ விபத்திற்கான காரணம் குறித்த விசாரணைகளும் தீவிரமாக முன்னெடுக்கப்பட்டு வருகின்றன.

© Kapo Wallis