சுவிஸ் படை பங்கர்கள் இப்போது டேட்டா மையங்களாக மாற்றம்

சுவிஸ் படை பங்கர்கள் இப்போது டேட்டா மையங்களாக மாற்றம்

உலகம் முழுவதும் நிறுவனங்கள் தங்களின் முக்கியமான மற்றும் பாதுகாப்பு தேவையுள்ள தரவுகளை பாதுகாக்கும் இடங்களைத் தேடிக்கொண்டிருக்கின்றன. இந்த நிலையில், சுவிட்சர்லாந்தில் பயன்படுத்தப்படாமல் இருக்கும் பழைய இராணுவ பங்கர்கள் தற்போது டேட்டா மையங்களாக பெரும் வரவேற்பைப் பெற்று வருகின்றன.

இந்தப் பாதுகாப்பு மிக்க நிலத்தடி வசதிகள் குறித்து Bunker Swiss நிறுவனத்தின் விற்பனை மேலாளர் பாஸ்டியன் ஹென்றி தெரிவித்ததாவது, “இந்த நிலத்தடி இடங்கள் மிகவும் ரகசியமானவை. இருப்பினும், அவை உண்மையில் உள்ளன, மேலும் உயர் பாதுகாப்பு தரவுகளை சேமிக்க மிகவும் பொருத்தமானவை” என கூறினார்.

சுவிட்சர்லாந்தின் பங்கர்கள் குளிர்ச்சியான இயற்கை சூழல், அரசியல் நிலைத்தன்மை மற்றும் வலுவான பாதுகாப்பு கட்டமைப்புகளால் உலகளாவிய நிறுவனங்களின் கவனத்தை ஈர்த்துள்ளன. குறிப்பாக, சைபர் பாதுகாப்பு அச்சுறுத்தல்கள் அதிகரித்துள்ள நிலையில், நிலத்தடியில் பாதுகாப்பாக தரவை சேமிக்கும் தீர்வுகள் முக்கியத்துவம் பெற்றுள்ளன.

ஆனால், இத்தகைய வசதிகளுக்கான தேவை கிடைக்கும் இடங்களை விட மிக அதிகமாக உள்ளது. பாஸ்டியன் ஹென்றியின் தகவல்படி, அவரது நிறுவனத்திற்கு உலகம் முழுவதும் இருந்து வாரத்திற்கு சுமார் 100 விசாரணைகள் கிடைக்கின்றன. இதனால், பல வாடிக்கையாளர்கள் காத்திருப்பு பட்டியலிலும் உள்ளனர்.

“கிடைக்கும் இடங்கள் மிகவும் குறைவு. கையில் எண்ணக்கூடிய அளவில்தான் உள்ளது,” என அவர் குறிப்பிட்டார். மேலும், இந்த உயர்தர பாதுகாப்பு வசதிகளை பயன்படுத்துவதற்கான செலவு பல மில்லியன் சுவிஸ் ஃப்ராங்குகள் வரை உயரக்கூடும் என்றும் தெரிவித்தார்.

சுவிட்சர்லாந்து அதன் பாதுகாப்பு மற்றும் நம்பகத்தன்மைக்காக ஏற்கனவே உலகளவில் அறியப்பட்ட நிலையில், இப்போது டிஜிட்டல் காலத்திலும் அந்த நம்பிக்கையை மேலும் வலுப்படுத்தி வருகிறது.