மத்திய கிழக்கு பதற்றம்: சுவிட்சர்லாந்தில் பெட்ரோல் விலை 2 ஃப்ராங்கை நெருங்கும் வாய்ப்பு

மத்திய கிழக்கு பதற்றம்: சுவிட்சர்லாந்தில் பெட்ரோல் விலை 2 ஃப்ராங்கை நெருங்கும் வாய்ப்பு

மத்திய கிழக்கில் ஏற்பட்டுள்ள புதிய இராணுவ பதற்றம் உலக எண்ணெய் சந்தையில் பெரிய அதிர்வை ஏற்படுத்தியுள்ளது. குறிப்பாக இஸ்ரேல் மற்றும் அமெரிக்கா ஈரானுக்கு எதிராக தொடங்கிய தாக்குதல்களுக்குப் பிறகு, சர்வதேச சந்தையில் கச்சா எண்ணெய் விலை திடீரென உயர்ந்துள்ளது. இதன் தாக்கம் சுவிட்சர்லாந்திலும் உணரப்படத் தொடங்கியுள்ளது. எரிசக்தி துறை நிபுணர்கள் கூறுவதன்படி, அடுத்த சில நாட்களில் பெட்ரோல் மற்றும் டீசல் விலைகள் மேலும் உயரக்கூடும்.

சில நாட்களுக்கு முன்பு வரை சுவிட்சர்லாந்தில் 95 வகை பெட்ரோலின் சராசரி விலை லிட்டருக்கு சுமார் 1.74 சுவிஸ் ஃப்ராங்காக இருந்தது. ஆனால் தற்போதைய சந்தை நிலவரத்தில் அந்த அளவிலான விலையை பல எரிபொருள் நிலையங்களில் காண முடியாத நிலை ஏற்பட்டுள்ளது. நகரம் மற்றும் பிராந்தியத்தைப் பொறுத்து விலைகளில் வேறுபாடுகள் காணப்படுகின்றன. குறிப்பாக பெரிய பிராண்டு நிறுவனங்களின் நிலையங்கள் மற்றும் சுயாதீன எரிபொருள் நிலையங்களில் விலை மாறுபாடு தென்படுகிறது.

சுவிட்சர்லாந்தின் எண்ணெய் சந்தை நிறுவனங்களை ஒருங்கிணைக்கும் Avenergy Suisse அமைப்பு வெளியிட்ட எச்சரிக்கையின் படி, சர்வதேச சந்தை பதற்றம் தொடர்ந்தால் அடுத்த சில நாட்களில் எரிபொருள் விலைகள் கணிசமாக உயர வாய்ப்பு உள்ளது. குறிப்பாக உலக எண்ணெய் வர்த்தகத்தில் முக்கிய பாதையாக இருக்கும் Strait of Hormuz கடல் பாதையில் ஏற்பட்டுள்ள பாதுகாப்பு பிரச்சினைகள் இந்த உயர்வுக்கு முக்கிய காரணமாக கூறப்படுகின்றன.

இந்த நீரிணை வழியாக உலகளாவிய எண்ணெய் வர்த்தகத்தின் சுமார் ஐந்தில் ஒரு பகுதி கடந்து செல்கிறது. சமீபத்திய நாட்களில் பல வர்த்தக கப்பல்களுக்கு எதிராக தாக்குதல்கள் நடைபெற்றதாக தகவல்கள் வெளியாகியுள்ளன. இதனால் கப்பல் போக்குவரத்து பாதிக்கப்பட்டதுடன் சில எண்ணெய் சுத்திகரிப்பு நிலையங்களும் தங்களது உற்பத்தி திறனை குறைத்துள்ளன.

சுவிட்சர்லாந்தின் முக்கிய வாகன மற்றும் போக்குவரத்து அமைப்பான Touring Club Schweiz (TCS) வழங்கிய மதிப்பீட்டின் படி, வரும் நாட்களில் பெட்ரோல் விலை லிட்டருக்கு 2 ஃப்ராங்கை நெருங்கக்கூடும். அந்த அமைப்பின் எரிசக்தி சந்தை நிபுணர் எரிக் ஸ்வைசர் கூறுகையில், சர்வதேச சந்தையில் வெளியிடப்படும் எண்ணெய் விலை தரவுகளின் அடிப்படையில் விலை உயர்வு தொடரும் என கணிக்கப்பட்டுள்ளது.

சுவிட்சர்லாந்தில் மிகக்குறைந்த விலையில் எரிபொருள் நிரப்பவேண்டுமா.? மகிழ்ச்சியான செய்தி

அவரது மதிப்பீட்டின்படி, இந்த வார இறுதிக்குள் 95 வகை பெட்ரோலின் சராசரி விலை லிட்டருக்கு சுமார் 1.90 ஃப்ராங்கை எட்டக்கூடும். அதே நேரத்தில் டீசல் விலை லிட்டருக்கு சுமார் 2.20 ஃப்ராங்கு வரை உயரக்கூடும் என எதிர்பார்க்கப்படுகிறது.

இந்த உயர்வின் பின்னணியில் உலக சந்தையில் Brent crude oil விலையின் திடீர் உயர்வே முக்கிய காரணமாக பார்க்கப்படுகிறது. சமீபத்திய வர்த்தகத்தில் ஒரு பீப்பாய் பிரென்ட் எண்ணெய் விலை 103 டாலரை கடந்துள்ளது. சில மணிநேரங்களுக்கு முன்பு இந்த விலை 119 டாலர் வரை உயர்ந்ததாக சந்தை தரவுகள் தெரிவிக்கின்றன.

பிப்ரவரி மாத இறுதியில் மத்திய கிழக்கு பதற்றம் அதிகரிக்கும் முன்புடன் ஒப்பிடுகையில், தற்போது உலக எண்ணெய் விலை சுமார் 70 சதவீதம் உயர்ந்துள்ளது. இது 2022 ஆம் ஆண்டு உக்ரைன் போருக்குப் பிறகு ஏற்பட்ட உலகளாவிய எரிசக்தி நெருக்கடியின் போது காணப்பட்ட விலை நிலைகளை நினைவூட்டுவதாக பொருளாதார ஆய்வாளர்கள் கூறுகின்றனர்.

இந்நிலையில் விலை உயர்வு இருந்தாலும் சுவிட்சர்லாந்தின் எண்ணெய் விநியோகம் தற்போது பாதுகாப்பாக உள்ளது என்று Avenergy Suisse தெரிவித்துள்ளது. நாட்டில் போதுமான அளவு எண்ணெய் இருப்புகள் உள்ளதால் உடனடி பற்றாக்குறை ஏற்படும் அபாயம் இல்லை என்றும் அந்த அமைப்பு உறுதிப்படுத்தியுள்ளது.

எனினும் சர்வதேச அரசியல் பதற்றம் நீடித்தால், எரிபொருள் விலைகள் மட்டுமல்லாமல் போக்குவரத்து செலவுகள் மற்றும் பொருட்களின் விலைகளிலும் தாக்கம் ஏற்படும் வாய்ப்பு இருப்பதாக பொருளாதார நிபுணர்கள் எச்சரிக்கை விடுத்துள்ளனர்.