சுவிஸில் நேரலை வீடியோ மூலம் வழிநடத்தப்படும் விசித்திர ஹோட்டல் கொள்ளைகள்

நள்ளிரவு… ஹோட்டலில் ஒரே ஒரு ஊழியர் மட்டுமே பணியில் இருக்கிறார்.

கதவு தட்டப்படுகிறது.

வெளியில் நிற்பவர் சாதாரணமாகத் தெரிகிறார்… அதனால் கதவு திறக்கப்படுகிறது.

ஆனால் அடுத்த சில நொடிகளில், முகமூடி அணிந்தவர்கள் உள்ளே நுழைகிறார்கள்!

ஊழியர் கட்டுப்படுத்தப்படுகிறார்… பாதுகாப்புப் பெட்டகத்தின் ரகசிய குறியீடு கேட்கப்படுகிறது…

அதிர்ச்சி என்ன தெரியுமா?

இந்த கொள்ளை நடப்பதை… ஹோட்டலுக்கு வெளியே இருக்கும் ஒருவர் தனது தொலைபேசியில் LIVE-ஆக பார்த்துக்கொண்டிருக்கிறார்!

அவர் அங்கிருந்து கொள்ளையர்களுக்கு அடுத்தடுத்து உத்தரவுகளை கொடுக்கிறார்.

சுவிட்சர்லாந்தில் நடந்த ஒன்பது ஹோட்டல் கொள்ளைகளுக்குப் பின்னால் இருந்த இந்த அதிர்ச்சிகரமான வலையமைப்பு எப்படி செயல்பட்டது?

யார் இந்த இளம் கொள்ளையர்கள்? அவர்களை யார் இயக்கினார்கள்?

இன்று இந்த சம்பவத்தின் முழு பின்னணியையும் பார்ப்போம்…

*************

சுவிஸ் ஹோட்டல்களையும் குறிவைத்த பிரான்ஸ் குற்றக் கும்பல்

சுவிட்சர்லாந்தில் கடந்த சில மாதங்களாக கார் கேரேஜ்கள், ஆயுதக் கடைகள் உள்ளிட்ட இடங்களில் கொள்ளைச் சம்பவங்கள் அதிகரித்து வரும் நிலையில், தற்போது ஹோட்டல்களும் இதுபோன்ற திட்டமிட்ட குற்றக் கும்பல்களின் இலக்காக மாறியிருப்பது தெரியவந்துள்ளது.

சமூக ஊடகங்கள் மூலம் பிரான்ஸில் இருந்து இளம் ஆட்கள் ஆட்சேர்ப்பு செய்யப்பட்டு, சுவிட்சர்லாந்தில் குறிப்பிட்ட குற்றச் செயல்களைச் செய்வதற்காக அவர்கள் அனுப்பப்படுவதாக விசாரணைகளில் தெரியவந்துள்ளது.

இந்த வழக்கில் முக்கியமான தகவல் என்னவென்றால், கொள்ளையர்கள் தாங்கள் செய்யும் நடவடிக்கைகளை நேரடியாக வீடியோ அழைப்பில் இருக்கும் குற்றக் கும்பல் தலைவர்களிடம் இருந்து வழிகாட்டுதல்களைப் பெற்றுக்கொண்டதாக கூறப்படுகிறது.

இந்த வார தொடக்கத்தில், வோ மாநிலத்தின் Vevey குற்றவியல் நீதிமன்றம் Lyon நகரைச் சேர்ந்த மூன்று இளைஞர்களுக்கு சிறைத்தண்டனை விதித்துள்ளது. அவர்களுக்கு முறையே ஆறு ஆண்டுகள், நான்கரை ஆண்டுகள் மற்றும் மூன்றரை ஆண்டுகள் சிறைத்தண்டனை வழங்கப்பட்டுள்ளது. 20 வயதைக் கடந்த இந்த மூவரும் தாங்கள் செய்த குற்றங்களை நீதிமன்றத்தில் ஒப்புக்கொண்டதாக 24heures செய்தி வெளியிட்டுள்ளது.

2023ஆம் ஆண்டு இறுதி முதல் 2025ஆம் ஆண்டு ஏப்ரல் வரை, Vaud, Bern, Valais மற்றும் Neuchâtel ஆகிய நான்கு மாநிலங்களில் உள்ள ஒன்பது ஹோட்டல்களில் இந்தக் குழு கொள்ளையடித்ததாக குற்றம் சாட்டப்பட்டுள்ளது. Gstaad பகுதியில் உள்ள மூன்று மற்றும் நான்கு நட்சத்திர ஹோட்டல்களும் இதில் அடங்குகின்றன. ஆனால் இந்த நீதிமன்றத் தீர்ப்பு இன்னும் இறுதி சட்டத் தீர்ப்பாகவில்லை.

குற்றவாளிகளை அடையாளம் காண DNA தடயங்களும் கண்காணிப்பு கேமரா பதிவுகளும் முக்கிய ஆதாரங்களாக இருந்துள்ளன.

கொள்ளைகள் பெரும்பாலும் இரவு நேரங்களில் நடத்தப்பட்டுள்ளன. அந்த நேரத்தில் ஹோட்டலில் ஒரே ஒரு ஊழியர் மட்டுமே பணியில் இருப்பதை குற்றவாளிகள் முன்கூட்டியே தெரிந்து வைத்திருந்ததாக விசாரணையில் தெரியவந்துள்ளது.

கொள்ளைக் குழுவில் ஒருவர் முகத்தை மறைக்காமல் ஹோட்டல் கதவைத் தட்டுவார். வழக்கமாக ஹோட்டல் ஊழியர் அவரை உள்ளே அனுமதித்தவுடன், முகமூடி அணிந்திருந்த மற்றவர்கள் உடனடியாக கட்டிடத்துக்குள் நுழைவார்கள்.

பின்னர் ஊழியரை கட்டுப்பாட்டுக்குள் கொண்டு வந்து ஹோட்டல் பாதுகாப்புப் பெட்டகத்தின் ரகசிய குறியீட்டை கேட்பார்கள். சில சம்பவங்களில் மிளகுத்தூள் ஸ்ப்ரே பயன்படுத்தப்பட்டதாகவும், சில இடங்களில் ஊழியர்களை நாற்காலியில் டேப்பால் கட்டியதாகவும், மேலும் சில சம்பவங்களில் நேரடியாக வன்முறை பயன்படுத்தப்பட்டதாகவும் அரசு தரப்பு தெரிவித்துள்ளது.

சில கொள்ளைகளில் 4,000 சுவிஸ் பிராங்குகளுக்கும் அதிகமான பணம் திருடப்பட்டதாகவும் கூறப்படுகிறது.

ஆனால் இந்த வழக்கை மிகவும் அதிர்ச்சிகரமாக்கும் மற்றொரு விஷயம் இருக்கிறது.

இந்த மூன்று இளைஞர்களும் தனியாக செயல்படவில்லை என விசாரணையில் தெரியவந்துள்ளது. அவர்களுக்கு பின்னால் பிரான்ஸைச் சேர்ந்த இரண்டு நபர்கள் இருந்ததாக கூறப்படுகிறது. அவர்களில் ஒருவர் இதுவரை அடையாளம் காணப்படவில்லை. மற்றொருவர் கிட்டத்தட்ட 30 வயதுடையவர் என்றும், தற்போது பிரான்ஸில் சிறையில் இருப்பதாகவும் தெரிவிக்கப்பட்டுள்ளது.

இந்த நபர்கள் Snapchat உள்ளிட்ட சமூக ஊடகங்கள் வழியாக இளைஞர்களைத் தொடர்புகொண்டு, குறிப்பிட்ட குற்றச் செயல்களுக்கு அவர்களைத் தேர்வு செய்ததாக விசாரணையில் கூறப்பட்டுள்ளது.

அதன் பிறகு, கொள்ளையடிக்க வேண்டிய ஹோட்டல் பற்றிய தகவல்கள் அவர்களுக்கு அனுப்பப்பட்டுள்ளன. ஹோட்டலின் முகவரி, கொள்ளை நடத்த வேண்டிய நேரம், கட்டிடத்துக்குள் நுழைய வேண்டிய கதவு போன்ற விவரங்கள் முன்கூட்டியே வழங்கப்பட்டுள்ளன.

Martigny நகரில் உள்ள ஒரு ஹோட்டலை கொள்ளையடிக்கச் சென்றபோது, எந்தக் கதவு வழியாக உள்ளே செல்ல வேண்டும் என்பதைக் காட்டும் வகையில் அந்தக் கட்டிடத்தின் புகைப்படமே கொள்ளையர்களுக்கு அனுப்பப்பட்டதாக அரசு தரப்பு தெரிவித்துள்ளது.

மேலும், கொள்ளை நடக்கும் நேரத்திலும் குற்றக் கும்பலின் பின்னால் இருப்பவர்கள் தொலைபேசி அல்லது வீடியோ அழைப்பு மூலம் கொள்ளையர்களுடன் தொடர்பில் இருந்ததாக கூறப்படுகிறது. அதாவது, இவர்கள் வெறுமனே ஒரு இடத்தைத் தேர்வு செய்து கொள்ளையர்களை அனுப்பவில்லை. கொள்ளை நடக்கும் தருணத்திலேயே வெளியில் இருந்து நடவடிக்கையை கண்காணித்து, தேவையான அறிவுறுத்தல்களை வழங்கியிருக்கலாம் என்பதே விசாரணையின் முக்கிய கண்டுபிடிப்பாக உள்ளது.

இதுபோன்ற முறைகள் சுவிட்சர்லாந்தில் உள்ள ஆயுதக் கடைகள் மற்றும் கார் கேரேஜ்களில் நடந்த கொள்ளைகளிலும் காணப்பட்டுள்ளதாக Federal Office for Police, அதாவது Fedpol தெரிவித்துள்ளது.

இளம் குற்றவாளிகள் கொள்ளைச் சம்பவங்களை வீடியோவாக பதிவு செய்ய வேண்டும் என்று பின்னணியில் இருக்கும் நபர்கள் கட்டாயப்படுத்திய சம்பவங்களும் இருப்பதாக Fedpol கூறுகிறது. அந்த வீடியோக்கள் பின்னர் சமூக ஊடகங்களில் பிரச்சாரப் பொருளாக பயன்படுத்தப்படுவதுடன், இளைஞர்களை மேலும் குற்றங்களில் ஈடுபட வைக்கும் ஒரு அழுத்தக் கருவியாகவும் பயன்படுத்தப்பட்டதாக தெரிவிக்கப்பட்டுள்ளது.

இந்த குற்ற வலையமைப்புகளை எதிர்கொள்ள Fedpol மற்றும் Zürich Cantonal Police இணைந்து தனிப்படை ஒன்றையும் செயல்படுத்தி வருகின்றன.

கடந்த ஒன்றரை ஆண்டுகளில் மட்டும், சமூக ஊடகங்கள் மூலம் சுவிட்சர்லாந்தில் குற்றச் செயல்களில் ஈடுபடுவதற்காக ஆட்சேர்ப்பு செய்யப்பட்டதாகக் கருதப்படும் குறைந்தது 360 இளம் நபர்கள் அடையாளம் காணப்பட்டுள்ளதாக அதிகாரிகள் தெரிவித்துள்ளனர்.

இதிலிருந்து ஒரு முக்கியமான விஷயம் தெளிவாகிறது. சுவிட்சர்லாந்தில் நடைபெறும் சில கொள்ளைகள், சம்பவ இடத்தில் இருக்கும் ஒரு சில இளைஞர்களின் திடீர் முடிவு மட்டுமல்ல. சமூக ஊடகங்கள் மூலம் ஆட்களைத் தேர்வு செய்து, இடங்களை முன்கூட்டியே ஆய்வு செய்து, புகைப்படங்கள் மற்றும் வழிமுறைகளை வழங்கி, சில சமயங்களில் கொள்ளை நடக்கும் நேரத்திலேயே வீடியோ அழைப்பில் இருந்து வழிகாட்டும் வகையில், எல்லை தாண்டிய குற்ற வலையமைப்புகள் செயல்படுவதாக விசாரணைகள் காட்டுகின்றன.

சுவிட்சர்லாந்தில் வாழும் தமிழர்களைப் பொறுத்தவரை, குறிப்பாக ஹோட்டல்கள், கடைகள், கேரேஜ்கள் மற்றும் இரவு நேரங்களில் தனியாக பணிபுரியும் ஊழியர்கள், பாதுகாப்பு நடவடிக்கைகளில் கூடுதல் கவனம் செலுத்த வேண்டிய சூழல் உருவாகியுள்ளது.

இது வெறும் ஒரு ஹோட்டல் கொள்ளை வழக்கு அல்ல. சமூக ஊடகங்கள் எவ்வாறு திட்டமிட்ட குற்றச் செயல்களுக்காக இளைஞர்களை பயன்படுத்தும் ஒரு புதிய குற்றவியல் வலையமைப்பாக மாறுகின்றன என்பதற்கான மற்றொரு எச்சரிக்கையாகவும் இந்த வழக்கு பார்க்கப்படுகிறது.