சூரிச் HB-யில் பயணிகளுக்கு மீண்டும் அதிர்ச்சி! SZU நிலையம் டிசம்பர் வரை மூடல்!
சூரிச் HB-க்கு பயணம் செய்யும் பயணிகளுக்கு முக்கிய அறிவிப்பு!
SZU-வின் நிலத்தடி ரயில் நிலையம் திட்டமிட்டதைவிட நீண்ட காலம் மூடப்பட்டிருக்கும்!
சூரிச் HB மற்றும் சூரிச் செல்னாவு இடையேயான SZU ரயில் சேவை, முதலில் திட்டமிட்டபடி அக்டோபரில் மீண்டும் தொடங்காது.
கட்டுமானப் பணிகளில் ஏற்பட்ட தாமதம் காரணமாக, நிலையம் டிசம்பர் 13, 2026 அன்று மீண்டும் திறக்க திட்டமிடப்பட்டுள்ளது.
இந்த நிலையம் தற்போது எதிர்காலப் பயணிகளின் எண்ணிக்கைக்கு ஏற்ப மேம்படுத்தப்பட்டு வருகிறது.
இதன் ஒரு பகுதியாக நடைமேடைகள் நீட்டிக்கப்படுவதுடன், தற்போதுள்ள நுழைவாயில்களும் மாற்றியமைக்கப்படுகின்றன.
மேலும், 21 மற்றும் 22ஆம் நடைமேடைகளுக்கு புதிய கூடுதல் நுழைவாயிலும் அமைக்கப்படுகிறது.
முதலில், மே முதல் அக்டோபர் வரை சுமார் 24 வாரங்களுக்கு நிலையத்தை முழுமையாக மூட திட்டமிடப்பட்டிருந்தது.
ஆனால் நிலத்தடி முனைய நிலையத்தின் விரிவாக்கப் பணிகளில் எதிர்பாராத தாமதங்கள் ஏற்பட்டுள்ளன.
குறுகிய இடத்தில் ஒன்றுக்கொன்று தொடர்புடைய பல்வேறு பணிகளை ஒரே நேரத்தில் ஒருங்கிணைக்க வேண்டியிருந்ததால், கட்டுமான கால அட்டவணையை மறுசீரமைக்க வேண்டிய நிலை ஏற்பட்டதாக SZU தெரிவித்துள்ளது.
மேலும், கட்டமைப்புப் பணிகள் முடிந்த பிறகும், தீயணைப்பு காற்றோட்ட அமைப்பு உள்ளிட்ட பாதுகாப்பு அமைப்புகள் நிறுவப்பட்டு, ஆய்வு மற்றும் சோதனை செய்யப்பட வேண்டும்.
இதனால், நிலையத்தை முன்கூட்டியே பகுதியளவில் திறப்பதும் நடைமுறைக்கு சாத்தியமில்லை என SZU தெரிவித்துள்ளது.
அதுவரை தற்போதுள்ள மாற்று போக்குவரத்து திட்டம் தொடரும் என்றும், தேவைக்கேற்ப சில மாற்றங்கள் செய்யப்படும் என்றும் தெரிவிக்கப்பட்டுள்ளது.
எனவே சூரிச் HB வழியாக SZU ரயிலில் பயணம் செய்யும் பயணிகள், டிசம்பர் 13 வரை மாற்று ஏற்பாடுகளை கவனத்தில் கொள்ள வேண்டிய நிலை ஏற்பட்டுள்ளது.