வரி முறையில் பெரிய மாற்றம்: மார்ச் 9ல் சுவிட்சர்லாந்து மக்கள் வாக்கெடுப்பு
வரி முறையில் பெரிய மாற்றம்: மார்ச் 9ல் சுவிட்சர்லாந்து மக்கள் வாக்கெடுப்பு
சுவிட்சர்லாந்தில் வரி முறையில் முக்கிய மாற்றத்தை கொண்டு வருவதற்கான தீர்மானத்தை எடுக்க, மார்ச் 9ஆம் தேதி பொதுமக்கள் வாக்கெடுப்பில் பங்கேற்க உள்ளனர். இந்த முன்மொழிவு அமல்பட்டால், தற்போதுள்ள குடும்ப அடிப்படையிலான வரி கணக்கீட்டு முறைக்கு மாற்றாக, தனிநபர் அடிப்படையிலான வரி முறை அறிமுகப்படுத்தப்படும்.
இந்த மாற்றத்தின் முக்கிய நோக்கம், ‘திருமண வரி அபராதம்’ என அழைக்கப்படும் நிலைமையை நீக்குவதாகும். தற்போது, இரண்டு பேர் வருமானம் ஈட்டும் திருமணமான தம்பதிகள், அதே அளவு வருமானம் கொண்ட திருமணம் செய்யாத தம்பதிகளை விட அதிகமான கூட்டாட்சி வரி செலுத்த வேண்டிய நிலை உள்ளது. இதை அநியாயமானதாகக் கருதி, புதிய முறை முன்வைக்கப்பட்டுள்ளது.
இந்த வரி சீர்திருத்தத்திற்கு Federal Council மற்றும் பாராளுமன்றத்தின் மிகக் குறைந்த பெரும்பான்மை ஆதரவு வழங்கி வருகிறது. குறிப்பாக, இரண்டாம் வருமானம் ஈட்டுபவர்கள், பெரும்பாலும் தாய்மார்கள், அதிகமாக வேலை செய்ய ஊக்குவிக்கப்படுவார்கள் என அரசு தரப்பு வாதிடுகிறது. இதன் மூலம் வேலைவாய்ப்பு சந்தையில் பெண்களின் பங்கேற்பு அதிகரிக்கும் என்றும் அவர்கள் கூறுகின்றனர்.
ஆனால் இந்த முன்மொழிவுக்கு எதிர்ப்பும் வலுவாக உள்ளது. Swiss People’s Party மற்றும் மத்தியக் கட்சி உள்ளிட்ட எதிர்க்கட்சிகள், இந்த மாற்றம் ஒரே வருமானம் கொண்ட பாரம்பரிய குடும்பங்களை பாதிக்கும் என எச்சரிக்கின்றன. மேலும், இதனால் கூட்டாட்சி அரசின் வருவாயில் ஆண்டுக்கு சுமார் 600 மில்லியன் சுவிஸ் ஃப்ராங்குகள் இழப்பு ஏற்படும் என்றும் அவர்கள் கூறுகின்றனர்.
இதற்கு பதிலளிக்கும் ஆதரவாளர்கள், ஆரம்பத்தில் வருவாய் குறைந்தாலும், பின்னர் வேலைக்கு திரும்பும் பெண்களின் எண்ணிக்கை அதிகரிப்பதால் அரசின் வரி வருவாய் மீண்டும் உயரும் என நம்பிக்கை வெளியிடுகின்றனர்.
இந்த மாற்றம் கூட்டாட்சி வரி மட்டுமின்றி, கன்டோன் மற்றும் உள்ளாட்சி வரிகளையும் பாதிக்கும் என்பதால், குறைந்தது பத்து கன்டோன்கள் தனித்தனியாக இதுகுறித்து வாக்கெடுப்பு நடத்த திட்டமிட்டுள்ளதாக அறிவித்துள்ளன. இதனால், ஒரே விஷயத்தில் நாடு முழுவதும் பல நிலைகளில் அரசியல் விவாதம் உருவாகியுள்ளது.
அதே நேரத்தில், இந்த புதிய முறையால் நிர்வாக சிக்கல்களும் அதிகரிக்கலாம் என அதிகாரிகள் எச்சரிக்கின்றனர். ஒவ்வொருவரும் தனித்தனியாக வரி அறிக்கையை சமர்ப்பிக்க வேண்டிய நிலை ஏற்பட்டால், சுமார் 20 லட்சம் புதிய வரி கோப்புகள் உருவாகும். இது வரித்துறைக்கு கூடுதல் பணிச்சுமையை ஏற்படுத்தும் என மதிப்பிடப்படுகிறது.
இந்த நிலையில், வரி நியாயம், சமூக சமத்துவம் மற்றும் அரசின் நிதிநிலை ஆகியவற்றுக்கு இடையிலான சமநிலையை மக்கள் எவ்வாறு மதிப்பிடுகிறார்கள் என்பதே, மார்ச் 9ஆம் தேதியிலான வாக்கெடுப்பின் முடிவை தீர்மானிக்கும் முக்கிய காரியமாக இருக்கும்.
© WRS
