ஃபெய்டோவில் அதிர்ச்சி சம்பவம்… மறுவாழ்வு மையத்தில் நடந்தது என்ன? காவல்துறை தீவிர விசாரணை!

ஃபெய்டோவில் அதிர்ச்சி சம்பவம்… மறுவாழ்வு மையத்தில் நடந்தது என்ன? காவல்துறை தீவிர விசாரணை!

சுவிட்சர்லாந்தின் டிசினோ மாகாணத்தில் உள்ள ஃபெய்டோவில், மறுவாழ்வு மையத்தில் சிகிச்சை பெற்று வந்த 56 வயது பெண் ஒருவர் துப்பாக்கிச் சூட்டுக் காயத்தால் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.

வியாழக்கிழமை இரவு 8 மணிக்குச் சற்றுப் பின்னர், பிளெனியோ பள்ளத்தாக்கைச் சேர்ந்த அந்த சுவிஸ் பெண், தலையில் பலத்த துப்பாக்கிச் சூட்டுக் காயத்துடன் மறுவாழ்வு மையத்தில் கண்டெடுக்கப்பட்டார்.

தகவல் கிடைத்தவுடன், மாகாண காவல்துறையினரும் ரெகா வான்வழி மீட்பு சேவை குழுவினரும் உடனடியாக சம்பவ இடத்துக்குச் சென்றனர். பின்னர், அந்தப் பெண் அவசர சிகிச்சைக்காக ஹெலிகாப்டர் மூலம் மருத்துவமனைக்கு கொண்டு செல்லப்பட்டார்.

ஆனால், மருத்துவர்களின் தீவிர முயற்சிகள் பலனளிக்காமல், அவர் பின்னர் சிகிச்சை பலனின்றி உயிரிழந்ததாக அதிகாரிகள் உறுதிப்படுத்தியுள்ளனர்.

இந்தச் சம்பவத்தின் பின்னணி, துப்பாக்கிச் சூடு நடைபெற்ற விதம், சம்பவத்திற்குப் பொறுப்பானவர் யார் என்பது உள்ளிட்ட அனைத்து கோணங்களிலும் காவல்துறை தீவிர விசாரணை மேற்கொண்டு வருகிறது.

குறிப்பாக, தற்போது தேடப்பட்டு வரும் ஒரு நபரின் தொடர்பு குறித்து அதிகாரிகள் விசாரணை நடத்தி வருகின்றனர். இருப்பினும், விசாரணை பாதிக்கப்படாத வகையில் அந்த நபர் தொடர்பான மேலதிக விவரங்கள் இதுவரை வெளியிடப்படவில்லை.

இந்த வழக்கை அரசு வழக்கறிஞர் பெட்ரா கனோனிகா அலெக்ஸாகிஸ் தலைமையில் விசாரித்து வருகிறார்.

இந்தச் சம்பவம் தொடர்பான உண்மையான காரணம் என்ன? இது திட்டமிட்ட தாக்குதலா அல்லது வேறு ஏதேனும் பின்னணி உள்ளதா? என்ற கேள்விகளுக்கான பதிலை கண்டறிய காவல்துறையின் விசாரணை தொடர்ந்து நடைபெற்று வருகிறது.