சியோனில் அதிரடி நடவடிக்கை! ஆயுதக் கடை கொள்ளை வழக்கில் 7 பேர் கைது… பெரும்பாலான பொருட்கள் மீட்பு!

சியோனில் அதிரடி நடவடிக்கை! ஆயுதக் கடை கொள்ளை வழக்கில் 7 பேர் கைது… பெரும்பாலான பொருட்கள் மீட்பு!

சுவிட்சர்லாந்தின் வாலெய்ஸ் மாகாணத் தலைநகர் சியோனில் உள்ள ஒரு துப்பாக்கிக் கடையில் நடைபெற்ற துணிச்சலான கொள்ளைச் சம்பவம், சில மணி நேரங்களிலேயே காவல்துறையின் அதிரடி நடவடிக்கையால் முறியடிக்கப்பட்டுள்ளது.

சனிக்கிழமை நள்ளிரவுக்கு சற்று முன்பு, மர்ம நபர்கள் துப்பாக்கிக் கடையின் பிரதான கதவை உடைத்துக்கொண்டு உள்ளே நுழைந்து, மதிப்புமிக்க பொருட்களை திருடிவிட்டு, பிரான்ஸ் பதிவு செய்யப்பட்ட காரில் தப்பிச் சென்றதாக காவல்துறைக்கு தகவல் கிடைத்தது.

தப்பிச் சென்ற கும்பல், வழியில் அமைக்கப்பட்டிருந்த காவல்துறை சோதனைச் சாவடியையும் உடைத்துக்கொண்டு வேகமாக சென்றது. பின்னர், வெரோசாஸ் பகுதியில் காரை கைவிட்டு ஓடினர்.

காரில் இருந்த இருவர் உடனடியாக கைது செய்யப்பட்ட நிலையில், தப்பியோடிய மற்ற மூவரையும், அவர்களுக்கு உதவியதாகக் கூறப்படும் மேலும் இரண்டு பேரையும் காவல்துறையினர் விரைவாக கைது செய்தனர்.

இந்தத் தேடுதல் நடவடிக்கையில் ட்ரோன்கள், இரவுப் பார்வை மற்றும் வெப்பப் படமெடுக்கும் கருவிகளுடன் கூடிய சுவிஸ் இராணுவத்தின் சூப்பர் பூமா ஹெலிகாப்டரும் பயன்படுத்தப்பட்டது. பல காவல்துறை பிரிவுகள் இணைந்து மேற்கொண்ட இந்த அதிரடி நடவடிக்கையால், திருடப்பட்ட பொருட்களில் பெரும்பாலானவை மீட்கப்பட்டதாக அதிகாரிகள் தெரிவித்துள்ளனர்.

கைது செய்யப்பட்ட ஏழு பேரும் 16 முதல் 31 வயதுக்குட்பட்ட பிரெஞ்சு நாட்டவர்கள் என அடையாளம் காணப்பட்டுள்ளனர். அவர்கள் மீது அரசு வழக்கறிஞர் அலுவலகம் குற்றவியல் விசாரணையைத் தொடங்கியுள்ளது.