வறட்சியின் கொடூரம்… லிசாக்கில் வயல் முழுவதும் தீக்கிரை!
சுவிட்சர்லாந்தின் பெர்ன் மாகாணத்தில் உள்ள லிசாக் பகுதியில், சனிக்கிழமை அதிகாலை ஏற்பட்ட வயல் தீ விபத்து பெரும் பரபரப்பை ஏற்படுத்தியுள்ளது.
அதிகாலை சுமார் 3.30 மணியளவில், ஷாக்கன்ஸ்ட்ராஸ் பகுதியில் உள்ள விவசாய வயலில் திடீரென தீப்பிடித்ததாக அவசர தகவல் கிடைத்ததைத் தொடர்ந்து, பெர்ன் மாகாண காவல்துறையும் தீயணைப்புப் படையினரும் சம்பவ இடத்துக்கு விரைந்தனர்.
முதற்கட்ட விசாரணையின்படி, வைக்கோல் கட்டும் இயந்திரத்திற்கு அருகிலேயே தீ தொடங்கியிருக்கலாம் என்று அதிகாரிகள் சந்தேகிக்கின்றனர்.
சம்பவத்தை நேரில் பார்த்தவர்கள் கூறுகையில், விவசாயி வைக்கோல் கட்டுகளைத் தயாரித்துக் கொண்டிருந்தபோது திடீரென அவற்றில் தீப்பிடித்ததாகவும், சில நிமிடங்களிலேயே தீ வேகமாகப் பரவியதாகவும் தெரிவித்துள்ளனர்.
மற்றொரு சாட்சியாளர், வயலின் பெரிய பகுதி ஏற்கனவே தீயில் கருகியிருந்ததாகவும், தீயணைப்பு வாகனங்கள் தொடர்ந்து சம்பவ இடத்துக்கு வந்து தீயை கட்டுப்படுத்த போராடியதாகவும் கூறியுள்ளார்.
தற்போது நிலவி வரும் கடும் வறட்சி காரணமாகவே தீ மிக வேகமாகப் பரவியிருக்கலாம் என்றும் அதிகாரிகள் சந்தேகிக்கின்றனர்.
இந்தச் சம்பவத்தில் உயிரிழப்பு அல்லது காயம் ஏற்பட்டதாக இதுவரை தகவல் வெளியாகவில்லை. இருப்பினும், விவசாயியின் பல மாத உழைப்பு சில நிமிடங்களில் தீயில் கருகியிருப்பது அனைவரையும் சோகத்தில் ஆழ்த்தியுள்ளது.
