“வாடிக்கையாளர்களின் பேச்சை AI கேட்குமா? சுவிட்சர்லாந்தில் புதிய தொழில்நுட்ப முயற்சி!”

“வாடிக்கையாளர்களின் பேச்சை AI கேட்குமா? சுவிட்சர்லாந்தில் புதிய தொழில்நுட்ப முயற்சி!”

சுவிட்சர்லாந்தின் முன்னணி தொலைத்தொடர்பு நிறுவனமான ஸ்விஸ்காம், தனது கடைகளில் செயற்கை நுண்ணறிவு தொழில்நுட்பத்தை பயன்படுத்தும் புதிய முயற்சியை தொடங்கியுள்ளது.

வாடிக்கையாளர்களின் தேவைகளை சிறப்பாக புரிந்துகொள்வதற்காக, கடைகளில் அவர்களின் நடத்தை மற்றும் சேவை அனுபவத்தை AI மூலம் பகுப்பாய்வு செய்ய நிறுவனம் திட்டமிட்டுள்ளது.

இதற்காக கடைகளின் கூரைகளில் சென்சார்கள் மற்றும் மைக்ரோஃபோன்கள் பொருத்தப்பட்டு சோதனை நடத்தப்பட உள்ளது.

ஆராவ், பெர்ன் மற்றும் லோசான் ஆகிய மூன்று இடங்களில் உள்ள ஸ்விஸ்காம் கடைகளில் KIRA எனப்படும் AI Retail Analytics அமைப்பு முதற்கட்டமாக சோதிக்கப்படும்.

இந்த அமைப்பு, வாடிக்கையாளர் கடைக்குள் எவ்வளவு நேரம் இருக்கிறார், எவ்வளவு நேரம் காத்திருக்கிறார், அவருடைய பிரச்சனை தீர்க்க எவ்வளவு நேரம் ஆகிறது போன்ற தகவல்களை ஆய்வு செய்யும்.

மேலும், வாடிக்கையாளர் மற்றும் ஊழியர் இடையேயான உரையாடல்கள் மூலம் சேவையின் தரத்தை மேம்படுத்தவும் இது உதவும் என நிறுவனம் தெரிவித்துள்ளது.

ஒரு வாடிக்கையாளர் கடைக்குள் நுழைந்ததும் சென்சார் அவரை கண்டறியும். ஊழியருடன் உரையாடல் தொடங்கும் முன், பதிவு செய்யப்படுவதாக வாடிக்கையாளருக்கு தெரிவிக்கப்படும்.

வாடிக்கையாளர் விரும்பவில்லை என்றால் பதிவு மறுக்க முடியும் என்றும் ஸ்விஸ்காம் தெரிவித்துள்ளது.

பதிவு செய்யப்பட்ட தகவல்கள் அடையாளம் நீக்கப்பட்ட பிறகு மட்டுமே பயன்படுத்தப்படும். பெயர், தொலைபேசி எண், பிறந்த தேதி போன்ற தனிப்பட்ட விவரங்கள் சேமிக்கப்படாது.

உரையாடல் முடிந்தவுடன் சென்சார் மற்றும் ஒலி பதிவுகள் அழிக்கப்படும் என்றும் நிறுவனம் கூறியுள்ளது.

இந்த சோதனை வெற்றியடைந்தால், இந்த ஆண்டின் இறுதிக்குள் மேலும் பல ஸ்விஸ்காம் கடைகளில் இந்த தொழில்நுட்பத்தை விரிவுபடுத்த திட்டமிடப்பட்டுள்ளது.

எதிர்காலத்தில் AI அவதாரங்கள் மற்றும் AI உதவியாளர்கள் மூலம் வாடிக்கையாளர் சேவையை வேகப்படுத்தும் திட்டத்தையும் ஸ்விஸ்காம் பரிசீலித்து வருகிறது.