செயின்ட் கேலனில் ஒரே இரவில் அதிரடி சோதனை: 19 போக்குவரத்து விதிமீறல்கள் கண்டுபிடிப்பு, 4 பேரின் உரிமங்கள் பறிமுதல்

சுவிட்சர்லாந்தின் செயின்ட் கேலனில் சனிக்கிழமை நண்பகலிலிருந்து ஞாயிற்றுக்கிழமை அதிகாலை வரை மேற்கொள்ளப்பட்ட தீவிர போக்குவரத்து கண்காணிப்பு நடவடிக்கைகளின் போது, மொத்தம் 19 பேர் பல்வேறு போக்குவரத்து விதிமீறல்களில் சிக்கியுள்ளனர். இதில் 16 ஆண்களும் 3 பெண்களும் அடங்குவதாக செயின்ட் கேலன் மாகாண காவல்துறை தெரிவித்துள்ளது.

போலீசார் மேற்கொண்ட சோதனைகளில், செல்லுபடியாகும் ஓட்டுநர் உரிமம் இல்லாமல் வாகனம் ஓட்டுதல், மதுபோதையில் வாகனம் இயக்குதல், வாகனம் ஓட்டத் தகுதியற்ற நிலையில் பயணம் செய்தல் மற்றும் அதிக வேகத்தில் வாகனம் செலுத்துதல் போன்ற கடுமையான குற்றங்கள் பதிவாகியுள்ளன. இதில் நான்கு பேரின் ஓட்டுநர் உரிமங்கள் சம்பவ இடத்திலேயே பறிமுதல் செய்யப்பட்டுள்ளன.

செயின்ட் மார்கிரெத்தன், ஸ்டாட், ட்ரூபாக் மற்றும் வில் உள்ளிட்ட பகுதிகளில் மேற்கொள்ளப்பட்ட சோதனைகளின் போது, ஏற்கனவே உரிமம் ரத்து செய்யப்பட்டிருந்த போதிலும் அல்லது செல்லுபடியாகும் உரிமம் இன்றி நான்கு ஆண் ஓட்டுநர்கள் வாகனம் ஓட்டியமை கண்டறியப்பட்டது. அவர்களுக்கு எதிராக சட்ட நடவடிக்கைகள் தொடங்கப்பட்டுள்ளன.

ஆவ் மற்றும் கோல்டாச் பகுதிகளில் மேற்கொள்ளப்பட்ட தனிப்பட்ட சோதனைகளில், இரண்டு ஓட்டுநர்கள் வாகனம் இயக்கத் தகுதியற்ற நிலையில் இருந்ததாக அதிகாரிகள் சந்தேகித்தனர். அவர்களில் ஒருவரின் வெளிநாட்டு ஓட்டுநர் உரிமம் சுவிட்சர்லாந்தில் பயன்படுத்துவதற்காக செல்லாததாக அறிவிக்கப்பட்டதுடன், மற்றொருவரின் உரிமம் உடனடியாக பறிமுதல் செய்யப்பட்டது.

இதனிடையே, எஷன்பாக் மற்றும் ரிக்கன் பகுதிகளில் நடைபெற்ற வேகக் கண்காணிப்பு நடவடிக்கைகளில் பல அதிவேக மீறல்கள் பதிவாகின. மணிக்கு 50 கிலோமீட்டர் வேக வரம்பு உள்ள பகுதியில் சிலர் 77 கிலோமீட்டர் வேகம் வரை சென்றிருந்தனர். மேலும், மணிக்கு 80 கிலோமீட்டர் வேக வரம்பு நிர்ணயிக்கப்பட்டிருந்த ராப்பர்ஸ்விலர்ஸ்ட்ராஸ் சாலையில், 32 வயதுடைய ஓட்டுநர் ஒருவர் மணிக்கு 131 கிலோமீட்டர் வேகத்தில் பயணித்தது அதிகாரிகளை அதிர்ச்சியடையச் செய்தது. இதையடுத்து அவரது ஓட்டுநர் உரிமம் சம்பவ இடத்திலேயே பறிமுதல் செய்யப்பட்டது.

அதே சோதனையில் பல வாகன ஓட்டுநர்கள் 100 கிலோமீட்டருக்கு மேற்பட்ட வேகத்தில் பயணித்ததும் பதிவாகியுள்ளது. மேலும், ஒரு மோட்டார் சைக்கிள் ஓட்டுநர் பயிற்சி உரிமத்திற்கான அடையாளப் பலகையை காட்சிப்படுத்தத் தவறியிருந்ததும் கண்டறியப்பட்டது.

ஞாயிற்றுக்கிழமை அதிகாலை ரைனெக் பகுதியில் நடைபெற்ற மற்றொரு சோதனையில், டெலிவரி வேன் ஓட்டிய 50 வயது நபர் ஒருவருக்கு மேற்கொள்ளப்பட்ட மூச்சுப் பரிசோதனையில் அனுமதிக்கப்பட்ட அளவை விட அதிகமான ஆல்கஹால் இருப்பது உறுதி செய்யப்பட்டது. அவரது ஓட்டுநர் உரிமமும் உடனடியாக பறிமுதல் செய்யப்பட்டது.

செயின்ட் கேலன் காவல்துறையின் தகவலின்படி, குற்றச்சாட்டுக்கு உள்ளான அனைத்து சாலைப் பயனாளர்களும் அரசு வழக்கறிஞர் அலுவலகத்திற்கு அறிவிக்கப்படவுள்ளனர். மேலும், சம்பந்தப்பட்ட சாலைப் போக்குவரத்து அலுவலகங்கள் கூடுதல் நிர்வாக நடவடிக்கைகள் எடுக்க வேண்டுமா என்பது குறித்து பரிசீலனை செய்யவுள்ளன.

சுவிட்சர்லாந்தில் சாலைப் பாதுகாப்பை உறுதிப்படுத்தும் நோக்கில் காவல்துறை தொடர்ந்து கடுமையான கண்காணிப்புகளை மேற்கொண்டு வரும் நிலையில், இந்த ஒரே இரவில் பதிவான அதிக எண்ணிக்கையிலான விதிமீறல்கள் சாலைப் பாதுகாப்பு தொடர்பான கவலைகளை மீண்டும் எழுப்பியுள்ளன.