எரிபொருள் விலை உயர்வு: சுவிட்சர்லாந்தில் டீசல் அதிகமாக உயர்ந்தது.!!

எரிபொருள் விலை உயர்வு: சுவிட்சர்லாந்தில் டீசல் அதிகமாக உயர்ந்தது

இரான் தொடர்பான போரியல் பதற்றங்கள் தொடங்கியதிலிருந்து சுவிட்சர்லாந்தில் எரிபொருள் விலைகள் கணிசமாக உயர்ந்துள்ளதாக புதிய ஆய்வு தெரிவிக்கிறது. குறிப்பாக டீசல் மற்றும் பெட்ரோல் வகைகளின் விலை கடந்த சில வாரங்களில் தெளிவாக அதிகரித்துள்ளதாக மோட்டார் பயணிகளுக்கான அமைப்பான TCS வெளியிட்ட தகவலில் கூறப்பட்டுள்ளது.

அமெரிக்கா மற்றும் இஸ்ரேல் இணைந்து இரானில் விமானத் தாக்குதல்களை மேற்கொண்ட காலப்பகுதியாகிய பிப்ரவரி மாத இறுதிக்குப் பிறகு எரிபொருள் விலைகளில் ஏற்பட்ட மாற்றத்தை TCS ஆய்வு செய்து வெளியிட்டுள்ளது. இந்த ஆய்விற்காக சுவிட்சர்லாந்து முழுவதும் உள்ள 3,200க்கும் மேற்பட்ட எரிபொருள் நிலையங்களில் விலைகள் கண்காணிக்கப்பட்டதாக தெரிவிக்கப்பட்டுள்ளது.

அந்த கணக்கில் தெரியவந்துள்ளது என்னவெனில், டீசல் எரிபொருள் தான் அதிகமான விலை உயர்வை பதிவு செய்துள்ளது. தற்போது ஒரு லிட்டர் டீசலின் சராசரி விலை 1.90 சுவிஸ் ஃப்ராங்க் வரை உயர்ந்துள்ளதுடன், இது சுமார் 8.6 சதவீதம் அதிகரிப்பாகும்.

பெட்ரோல் வகைகளில் Unleaded 95 விலை தற்போது ஒரு லிட்டருக்கு 1.70 ஃப்ராங்க் ஆக உயர்ந்துள்ளது. இது பிப்ரவரி இறுதியுடன் ஒப்பிடுகையில் 3.7 சதவீதம் அதிகரித்துள்ளது.

மற்றொரு பெட்ரோல் வகையான Unleaded 98 விலை உயர்வு சற்றே குறைவாக இருந்தாலும், அதுவும் உயர்வைச் சந்தித்துள்ளது. ஒரு லிட்டருக்கு அதன் விலை சுமார் 3.4 சதவீதம் அதிகரித்துள்ளதாக ஆய்வு தெரிவிக்கிறது.

உலகளாவிய அரசியல் பதற்றங்கள் மற்றும் மத்திய கிழக்கு பிராந்தியத்தில் நிலவும் பாதுகாப்பு சூழ்நிலைகள் காரணமாக கச்சா எண்ணெய் விலைகள் உயர்வதுடன், அதன் தாக்கம் ஐரோப்பிய நாடுகளின் எரிபொருள் சந்தைகளிலும் வெளிப்படுவதாக நிபுணர்கள் கூறுகின்றனர். அதன் விளைவாக சுவிட்சர்லாந்திலும் வாகன ஓட்டிகளுக்கு எரிபொருள் செலவு அதிகரித்துள்ள நிலையில், வருகிற வாரங்களில் விலை மேலும் மாறக்கூடும் என்ற எதிர்பார்ப்பும் உள்ளது. KeystoneSDA