சுவிட்சர்லாந்தில் மிகக் குறைந்த மழை: ஏப்ரல் மாதம் வரலாற்றிலேயே உலர்ந்த காலம்

சுவிட்சர்லாந்தில் மிகக் குறைந்த மழை: ஏப்ரல் மாதம் வரலாற்றிலேயே உலர்ந்த காலம்

சுவிட்சர்லாந்தில் கடந்த ஏப்ரல் மாதம் மிகவும் குறைந்த மழைப்பொழிவுடன் பதிவாகி, வானிலை வரலாற்றில் முக்கியமான மாற்றத்தை வெளிப்படுத்தியுள்ளது. MeteoSwiss வெளியிட்ட தகவலின்படி, 1991–2020 காலக்கட்ட சராசரியுடன் ஒப்பிடும்போது, இந்த ஆண்டின் ஏப்ரல் மாத மழைப்பொழிவு வெறும் 27 சதவீதமாக மட்டுமே இருந்துள்ளது. ஒரு மில்லிமீட்டருக்கு மேல் மழை பெய்த நாட்கள் கூட கையால் எண்ணக்கூடிய அளவிலேயே இருந்ததாக குறிப்பிடப்பட்டுள்ளது.

அதிகாரிகளின் தகவலின்படி, 1864 முதல் பதிவுகள் தொடங்கியதிலிருந்து இது நான்காவது மிகவும் உலர்ந்த ஏப்ரல் மாதமாகும். குறிப்பாக ஆல்ப்ஸ் மலைத்தொடரின் மேற்கு மற்றும் வடகிழக்கு சரிவுகளில் இதுவரை இல்லாத அளவிற்கு மழை குறைந்துள்ளது.

நாடு முழுவதும் கண்காணிக்கப்பட்ட 80க்கும் மேற்பட்ட இடங்களில், ஏப்ரல் மாத மழைப்பொழிவு புதிய குறைந்தபட்ச சாதனையை எட்டியுள்ளது. Bernese Oberland, Graubünden மற்றும் Aargau கன்டோனில் உள்ள Zofingen–Aarau பகுதிகளில் 20க்கும் மேற்பட்ட இடங்களில் 10 மில்லிமீட்டருக்கும் குறைவான மழை பதிவாகியுள்ளது.

ஆனால், மழை குறைவாக இருப்பது மட்டும் வறட்சியை முழுமையாக குறிக்காது என்றும் வானிலை நிபுணர்கள் குறிப்பிடுகின்றனர். நதிகள், ஏரிகள், நிலத்தடி நீர் நிலை, மண் ஈரப்பதம் மற்றும் தாவரங்களின் நிலை ஆகியவையும் இதனை தீர்மானிக்கின்றன. இருப்பினும், ஏப்ரல் 20ஆம் தேதியிலிருந்து நாட்டின் பெரும்பாலான பகுதிகளில் உலர்ந்த நிலை தென்படத் தொடங்கியுள்ளது.

இதற்கிடையில், ஏப்ரல் மாதம் வெறும் உலர்ச்சியிலேயே அல்லாமல், அதிக சூரிய ஒளியுடனும் புதிய சாதனையை பதிவு செய்துள்ளது. சாதாரண அளவுடன் ஒப்பிடுகையில் 130 முதல் 155 சதவீதம் வரை அதிக சூரிய ஒளி பதிவாகியுள்ளது.

குறிப்பாக வோட் கன்டோனில் உள்ள Pully பகுதியில் 284.4 மணிநேர சூரிய ஒளி பதிவாகி, 1938ஆம் ஆண்டு பதிவான முந்தைய சாதனையை முறியடித்துள்ளது. இந்த மாற்றங்கள் சுவிட்சர்லாந்தில் வானிலை மாற்றங்கள் வேகமாக இடம்பெற்று வருவதை சுட்டிக்காட்டுகின்றன.