சுவிட்சர்லாந்தில் நிரம்பி வழியும் சிறைச்சாலைகள் – ஆனால் அனைவரும் குற்றவாளிகள் அல்ல..

சுவிட்சர்லாந்தில் நிரம்பி வழியும் சிறைச்சாலைகள் – ஆனால் அனைவரும் குற்றவாளிகள் அல்ல..

சுவிட்சர்லாந்தின் சமீபத்திய கூட்டாட்சி புள்ளிவிபரங்களின்படி, நாட்டின் சிறைகள் தற்போது நிரம்பியுள்ளன ஆனால் உண்மையான குற்றவாளிகளால் அல்ல, மாறாக அபராதத்தை செலுத்த முடியாதவர்களால் பெருமளவில் நிரம்பியுள்ளதாக தெரிவிக்கப்படுகிறது.

புள்ளிவிபரங்களின்படி, சிறையில் அடைக்கப்பட்டவர்களில் பாதிக்கு மேற்பட்டோர் தண்டனையாக அல்ல, வெறும் அபராதம் செலுத்தாததற்காகவே சிறைபிடிக்கப்பட்டுள்ளனர். 2024 ஆம் ஆண்டில் மட்டும் நாடு முழுவதும் 9,030 பேர் சிறையில் அடைக்கப்பட்டுள்ளனர்.  சுமார் 5,000 பேர் அபராதம் செலுத்தாததால் சிறையில் அடைக்கப்பட்டுள்ளனர். இதில் பெரும்பாலான வழக்குகள், பொதுப் போக்குவரத்து கட்டணத் தவிர்ப்புகள் போன்ற சிறிய குற்றங்களுக்காக விதிக்கப்பட்ட அபராதங்களாகும்.

இத்தகைய குறுகியகால சிறைத் தண்டனைகள், வரி செலுத்தும் குடிமக்களுக்கு பெரும் சுமையாக மாறியுள்ளன. ஒருவரை ஒரு நாளுக்கு சிறையில் வைப்பதற்கான செலவு சுமார் 200 சுவிஸ் பிராங்க் என கணிக்கப்பட்டுள்ளது. இதனால் அரசின் ஆண்டுத் தொகைச் செலவுகள் கணிசமாக உயரும் நிலை ஏற்பட்டுள்ளது.

இந்நிலையைக் கருத்தில் கொண்டு, சுவிட்சர்லாந்து பாராளுமன்றத்தில் தற்போது புதிய சட்ட முன்மொழிவு ஒன்றை விவாதித்து வருகிறது. அதன்படி, அபராதம் செலுத்த முடியாதவர்களை சிறையில் அடைப்பதற்குப் பதிலாக, சமூக சேவை (community service) மூலம் தண்டனை நிறைவேற்றும் வழிமுறை அறிமுகப்படுத்தப்படலாம்.

கூட்டாட்சி கவுன்சில் (Federal Council) இதனை ஆதரித்து, சமூக சேவை முறைமையை நடைமுறைப்படுத்துவது சிறைகளின் நெரிசலை குறைத்து, அரசின் செலவுகளைப் பெருமளவில் சேமிக்கும் என்று தெரிவித்துள்ளது.

சுவிட்சர்லாந்தில் “அபராதச் சிறை” (Ersatzfreiheitsstrafe) எனப்படும் இந்த நடைமுறை பல ஆண்டுகளாக விமர்சனத்திற்கு உள்ளாகி வருகிறது. நிபுணர்கள், சிறிய அளவிலான அபராதங்களைச் செலுத்த முடியாத ஏழை மற்றும் சமூக ரீதியாகப் பாதிக்கப்பட்டவர்கள் அதிகம் பாதிக்கப்படுவதாகக் கூறுகின்றனர். சமூக சேவை முறைமை, அதே சமயம் குற்றத்தின் அளவிற்கு ஏற்ற தண்டனையாகவும், சமூகத்திற்கு பயனுள்ளதாகவும் இருக்கும் என்று சட்ட வல்லுநர்கள் வலியுறுத்துகின்றனர்.