திலீபன் மற்றும் சங்கர் நினைவேந்தல் நிகழ்வு சூரிச்சில் உணர்வுபூர்வமாக நடைபெற்றது
தமிழீழ விடுதலைப் போராட்டத்தில் உயிர்நீத்த தியாக தீபம் லெப்டினன்ட் கேணல் திலீபன் மற்றும் தமிழீழ வான்படையின் சிறப்புத் தளபதி கேணல் சங்கர் ஆகியோரின் நினைவேந்தல் நிகழ்வு சுவிட்சர்லாந்தின் சூரிச் மாநிலத்தில் உணர்வுபூர்வமாக நடைபெற்றது.
இந்த நிகழ்வு சுவிஸ் தமிழர் ஒருங்கிணைப்புக் குழுவின் ஏற்பாட்டில் 26 செப்டெம்பர் 2026 அன்று நடைபெற்றதாகத் தெரிவிக்கப்பட்டுள்ளது.
லெப்டினன்ட் கேணல் திலீபன், இந்திய அரசிடம் ஐந்து அம்சக் கோரிக்கைகளை முன்வைத்து, 1987 செப்டெம்பர் 15 முதல் 26 ஆம் தேதி வரை யாழ்ப்பாணம் நல்லூரில் நீர்கூட அருந்தாமல் உண்ணாநிலைப் போராட்டத்தில் ஈடுபட்டார். 2001 செப்டெம்பர் 26 அன்று முல்லைத்தீவு ஒட்டுசுட்டான் பகுதியில் இலங்கைப் படையினரின் கிளைமோர் தாக்குதலில் தமிழீழ வான்படையின் சிறப்புத் தளபதி கேணல் சங்கர் உயிரிழந்தார் என நிகழ்வில் நினைவுகூரப்பட்டது.
நிகழ்வின் ஆரம்பத்தில் பொதுச்சுடர் ஏற்றப்பட்டதுடன், தமிழீழ தேசியக் கொடி ஏற்றப்பட்டது. தொடர்ந்து ஈகைச்சுடர் ஏற்றப்பட்டு மலர்மாலை அணிவிக்கப்பட்டது. அதனைத் தொடர்ந்து அகவணக்கம், சுடர்வணக்கம் மற்றும் மலர்வணக்கம் ஆகிய நிகழ்வுகள் இடம்பெற்றன.
மக்கள் சுடர் மற்றும் மலர்வணக்கம் செலுத்தியதுடன், இசைக்கலைஞர்களால் எழுச்சிப் பாடல்களும் காணிக்கையாக வழங்கப்பட்டன.
நிகழ்வில் நூற்றுக்கணக்கானோர் கலந்துகொண்டதாக தெரிவிக்கப்பட்டுள்ளது. வணக்கப் பாடல்கள், கவிவணக்கம், நினைவுரை மற்றும் எழுச்சி நடனம் உள்ளிட்ட நிகழ்வுகளுடன் சிறப்புரையும் இடம்பெற்றது.
நிகழ்வின் இறுதியில் “நம்புங்கள் தமிழீழம்” பாடல் அனைவராலும் பாடப்பட்டது. தொடர்ந்து தமிழீழ தேசியக் கொடி கையேந்தலுடன் நிகழ்வுகள் நிறைவுபெற்றதாக சுவிஸ் தமிழர் ஒருங்கிணைப்புக் குழு தெரிவித்துள்ளது.
