பனியிலும் பசுமை மாறாத தமிழர்கள்! சுவிஸ் உயர்மட்டத் துறைகளில் ஈழத்தமிழர்களின் சாதனை

பனியிலும் பசுமை மாறாத தமிழர்கள்! சுவிஸ் உயர்மட்டத் துறைகளில் ஈழத்தமிழர்களின் சாதனை

போரால் தாயகத்தை விட்டு வெளியேறிய ஒரு தலைமுறை, இன்று தஞ்சமடைந்த நாட்டின் முக்கியத் துறைகளில் தலைசிறந்த நிபுணர்களாக உருவெடுத்துள்ள தனது அடுத்த தலைமுறையைப் பெருமையுடன் பார்க்கிறது.

போர், அகதி வாழ்க்கை, மொழி, கலாசாரம், காலநிலை எனப் பல்வேறு சவால்களைக் கடந்து சுவிட்சர்லாந்தில் வேரூன்றிய ஈழத்தமிழர்களின் பிள்ளைகள், இன்று மருத்துவம், தேசியப் பாதுகாப்பு, அறிவியல் மற்றும் சர்வதேச விவகாரங்கள் உள்ளிட்ட முக்கிய துறைகளில் தமது திறமைகளை வெளிப்படுத்தி வருகின்றனர்.

அத்தகைய சாதனையாளர்களில் குறிப்பிடத்தக்க மூன்று தமிழர்கள் பற்றிய தகவல்கள் சமூகவலைத்தளங்களில் வைரலாக பகிரப்பட்டு வருகின்றன.

டாக்டர் றெமோ ரெஜினோல்ட் (Dr. Remo Reginold)

Swiss Institute for Global Affairs (SIGA) எனப்படும் சுயாதீன ஆய்வு நிறுவனத்தின் தலைவராகப் பணியாற்றுகிறார். சுவிட்சர்லாந்தின் தேசியப் பாதுகாப்பு, சர்வதேச அரசியல் மற்றும் இராணுவ மூலோபாயம் தொடர்பான விடயங்களில் அரசாங்கங்களுக்கும் நிறுவனங்களுக்கும் ஆலோசனை வழங்கும் முக்கியப் பொறுப்பில் உள்ளார்.

டாக்டர் அபிராம் சந்திரலேகர் (Dr. Abiram Sandralegar)

சுவிஸ் இராணுவ மருத்துவர்கள் சங்கத்தின் (ASMD) துணைத்தலைவராகப் பொறுப்பு வகிக்கிறார். ஜெனீவாவில் நரம்பியல் அறுவைச் சிகிச்சைப் பயிற்சி மருத்துவராகவும் முனைவர் பட்ட ஆய்வாளராகவும் தனது மருத்துவ மற்றும் ஆய்வுப் பணிகளை முன்னெடுத்து வருகிறார்.

டாக்டர் ஆதர்சன் கண்ணதாசன் (Dr. Aatharshan Kannathasan)

பாசல் நகரில் அறுவைச் சிகிச்சைப் பயிற்சி மருத்துவராகப் பணியாற்றுகிறார். 2026 அக்டோபரில் பேர்னில் நடைபெற்ற போர் மற்றும் பேரிடர் மருத்துவ மாநாட்டின் அறிவியல் தலைமைக்குழுவிலும் இடம்பெற்றிருந்தார்.

இவர்கள் மூவருடன் தமிழர்களின் சாதனைப் பயணம் முடிந்துவிடவில்லை. சுவிட்சர்லாந்தின் பல்கலைக்கழகங்கள், மருத்துவமனைகள், அறிவியல் ஆய்வு நிறுவனங்கள், அரசியல், தேசியப் பாதுகாப்பு, இராணுவம் மற்றும் தொழில்நுட்பம் எனப் பல்வேறு துறைகளில் ஏராளமான தமிழர்கள் அமைதியாகத் தமது பங்களிப்பை வழங்கி வருகின்றனர்.

அவர்களில் பலர் இன்னும் பரவலாக அறியப்படாத சாதனையாளர்களாக இருக்கலாம்.

சுவிட்சர்லாந்தின் பனிமலைகளில் கடும் குளிரையும் தாங்கி ஆண்டு முழுவதும் பசுமையைத் தக்கவைத்துக்கொள்ளும் ஊசியிலை மரங்களைப் போல, புலம்பெயர் தமிழர்களும் எத்தனை சவால்கள் வந்தாலும் தமது அடையாளத்தையும் வேர்களையும் இழக்காமல் புதிய மண்ணில் உயர்ந்து நிற்கின்றனர்.

ஒரு தலைமுறை பாதுகாப்பைத் தேடி வந்தது. அடுத்த தலைமுறை அந்த நாட்டின் பாதுகாப்பு, மருத்துவம் மற்றும் அறிவியல் வளர்ச்சிக்குப் பங்களிக்கும் நிலைக்கு உயர்ந்துள்ளது. இது தனிநபர்களின் வெற்றி மட்டுமல்ல; ஒட்டுமொத்தத் தமிழ்ச் சமூகத்திற்கும் பெருமை சேர்க்கும் வளர்ச்சியாகும்.

இன்னும் வெளிச்சத்திற்கு வராத தமிழ்ச் சாதனையாளர்கள் பலர் இருக்கலாம். அவர்களைப் பற்றிய தகவல்கள் தெரிந்தவர்கள் அறிமுகப்படுத்துங்கள். அவர்களின் சாதனைகளும் அடுத்த தலைமுறைக்குத் தெரியப்படுத்தப்பட வேண்டும்.

பனிப்போர்வைக்குள்ளும் பசுமை மாறாத ஊசியிலை மரங்களாய் உயர்ந்து நிற்கும் புலம்பெயர் தமிழர்கள் அனைவருக்கும் சுவிஸ் தமிழ் ஊடகத்தின்  மனமார்ந்த வாழ்த்துகள்!

மூலப்பதிவு :- கல்லாறு சதீஸ்