13 நாட்கள் வெப்பம்… 200 முதியோர் உயிரிழப்பு! சுவிட்சர்லாந்தை அதிரவைத்த அதிர்ச்சி அறிக்கை!

13 நாட்கள் வெப்பம்… 200 முதியோர் உயிரிழப்பு! சுவிட்சர்லாந்தை அதிரவைத்த அதிர்ச்சி அறிக்கை!

சுவிட்சர்லாந்தில் வெப்ப அலை ஏற்படுத்திய அதிர்ச்சி… 65 வயதுக்கு மேற்பட்ட சுமார் 200 பேர் கூடுதலாக உயிரிழந்துள்ளதாக புதிய கூட்டாட்சி புள்ளிவிவரங்கள் தெரிவித்துள்ளன.

வெறும் 13 நாட்கள் மட்டுமே நீடித்த இந்த கடும் வெப்ப அலை, எதிர்பார்த்ததை விட 15 சதவீதம் அதிகமான இறப்புகளை முதியோரிடையே ஏற்படுத்தியுள்ளது. இந்த தகவல் நாடு முழுவதும் பெரும் கவலையை ஏற்படுத்தியுள்ளது.

இதற்கிடையில், ஐரோப்பாவின் பல நாடுகள் இன்னும் கடும் வெப்பத்தால் பாதிக்கப்பட்டுள்ளன. இந்த நிலையில், நியூசாடெல் பல்கலைக்கழகத்தின் காலநிலை ஆய்வாளர் மார்டின் ரெபெடெஸ் முக்கிய எச்சரிக்கை ஒன்றை விடுத்துள்ளார்.

அவரது கருத்துப்படி, எதிர்காலத்தில் வெப்ப அலைகள் இன்னும் அடிக்கடி ஏற்படும். அவை நீண்ட காலம் நீடிக்கும் மட்டுமல்லாமல், இதைவிட அதிக தீவிரத்துடனும் தாக்கக்கூடும் என்று அவர் எச்சரித்துள்ளார்.

மேலும், இத்தகைய காலநிலை மாற்றங்களை கருத்தில் கொண்டு, சுவிட்சர்லாந்து தனது வேலை நேரங்கள் மற்றும் பணியிட பாதுகாப்பு நடைமுறைகளை மறுபரிசீலனை செய்ய வேண்டிய அவசியம் இருப்பதாகவும் அவர் வலியுறுத்தியுள்ளார்.

குறிப்பாக முதியவர்கள், இதய நோய் மற்றும் சுவாசப் பிரச்சினைகள் உள்ளவர்கள் அதிக ஆபத்தில் இருப்பதால், போதுமான அளவு தண்ணீர் அருந்துதல், மதிய நேரங்களில் தேவையற்ற வெளிப்புறச் செயல்பாடுகளைத் தவிர்த்தல், குளிர்ச்சியான இடங்களில் இருப்பது போன்ற முன்னெச்சரிக்கை நடவடிக்கைகளை சுகாதார அதிகாரிகள் தொடர்ந்து வலியுறுத்தி வருகின்றனர்.

காலநிலை மாற்றத்தின் தாக்கம் இனி எதிர்காலப் பிரச்சினை அல்ல… அது இப்போது நம் வாழ்க்கையையே நேரடியாக பாதிக்கத் தொடங்கியுள்ளது என்பதற்கு இந்த வெப்ப அலை மற்றொரு எச்சரிக்கையாக மாறியுள்ளது.