சுவிட்சர்லாந்தில் 12 நாள் வெப்ப அலை முடிவுக்கு – பல பகுதிகளில் இடியுடன் கூடிய மழை எச்சரிக்கை

சுவிட்சர்லாந்தில் 12 நாள் வெப்ப அலை முடிவுக்கு – பல பகுதிகளில் இடியுடன் கூடிய மழை எச்சரிக்கை

சுவிட்சர்லாந்தை கடந்த சுமார் 12 நாட்களாக வாட்டி வந்த கடுமையான வெப்ப அலை, நாட்டின் பெரும்பாலான பகுதிகளில் தற்காலிகமாக முடிவுக்கு வந்துள்ளது. இருப்பினும், இந்த வாரத்தின் தொடக்கத்திலும் ஈரப்பதம் நிறைந்த வெப்பமான காலநிலை தொடரும் நிலையில், பல பகுதிகளில் பலத்த இடியுடன் கூடிய மழை மற்றும் புயல் எச்சரிக்கைகள் விடுக்கப்பட்டுள்ளன. இதே வேளை தூன் பகுதியில் நேற்று மாலை கடுமையான ஆலங்கட்டி மழை பெய்துள்ளது.

கடந்த இரண்டு வாரங்களாக ஆல்ப்ஸ் மலைத்தொடரின் இருபுறங்களிலும் உள்ள பல வானிலை நிலையங்களில் 33 முதல் 37 டிகிரி செல்சியஸ் வரை வெப்பநிலை பதிவாகியிருந்தது. இதில் அதிகபட்சமாக சனிக்கிழமை அன்று பாசல் நகரில் 39 டிகிரி செல்சியஸ் பதிவாகி புதிய உச்சத்தை எட்டியது.

வார இறுதியில் இருந்த அளவிற்கு வெப்பநிலை அதிகமாக இருக்காது என்றாலும், திங்கட்கிழமையும் நாட்டின் பல பகுதிகளில் வெப்பமும் ஈரப்பதமும் அதிகமாகவே காணப்பட்டது. இதனுடன், பல இடங்களில் பலத்த இடியுடன் கூடிய மழை பெய்யும் வாய்ப்பும் நிலவுகிறது.

கிராவ்புண்டன் மாகாணத்தின் சான் பெர்னார்டினோ பகுதியில், கடல் மட்டத்திலிருந்து 1,639 மீட்டர் உயரத்தில் அமைந்துள்ள வானிலை நிலையத்தில் திங்கட்கிழமை 24.2 டிகிரி செல்சியஸ் பதிவாகியது. இது அப்பகுதியில் இதுவரை பதிவான அதிகபட்ச வெப்பநிலையாகும். இதற்கு முன்பு 2025 ஆம் ஆண்டில் பதிவான 24.1 டிகிரி செல்சியஸே அங்குள்ள சாதனையாக இருந்தது.

திங்கட்கிழமை பிற்பகல் 2 மணியளவில், குறிப்பாக டிசினோ, வாலே மற்றும் மேற்கு சுவிட்சர்லாந்தின் பல பகுதிகளில் வெப்பநிலை மீண்டும் 30 டிகிரி செல்சியஸைத் தாண்டியது.

இந்நிலையில், சுவிட்சர்லாந்தின் பெரும்பாலான பகுதிகளுக்கு கூட்டாட்சி வானிலை சேவை அதிகாரப்பூர்வ வானிலை எச்சரிக்கையை வெளியிட்டுள்ளது. திங்கட்கிழமை பிற்பகல் 1 மணி முதல் பல இடங்களில் மூன்றாம் நிலை எச்சரிக்கை, அதாவது “கணிசமான அபாயம்” என்ற நிலை அமலுக்கு வந்துள்ளது. எனினும், டிசினோ மற்றும் எங்கடின் பகுதிகள் இதிலிருந்து விலக்கு பெறுகின்றன.

இதற்கிடையில், ஆல்ப்ஸ் மலைத்தொடரின் வடபகுதி மற்றும் வாலே மாகாணத்தில் வெப்ப அலை அதிகாரப்பூர்வமாக முடிவுக்கு வந்துள்ளதாக சுவிஸ் வானிலை அமைப்பான MeteoSwiss அறிவித்துள்ளது. இடியுடன் கூடிய மழை மற்றும் குளிர்ச்சியான காற்றின் வருகையால் அப்பகுதிகளில் வெப்பநிலை 26 முதல் 31 டிகிரி செல்சியஸ் வரை குறையும் என எதிர்பார்க்கப்படுகிறது.

ஆனால், மத்திய மற்றும் தெற்கு டிசினோ பகுதிகளிலும், கிராவ்புண்டனின் கீழ் மிசாக்ஸ் பகுதிகளிலும் வெப்பத்தின் தாக்கம் இன்னும் தொடர்கிறது. குறிப்பாக நகர்ப்புறங்களில் வெப்ப அழுத்தம் அதிகமாகவே காணப்படுவதால், அங்கு மூன்றாம் நிலை வெப்ப எச்சரிக்கை வெள்ளிக்கிழமை வரை நீட்டிக்கப்பட்டுள்ளது.

இன்று செவ்வாய்க்கிழமை வரை இந்த பகுதிகளில் சுமார் 33 டிகிரி செல்சியஸ் வரை வெப்பநிலை பதிவாகும் என MeteoSwiss தெரிவித்துள்ளது.