லீஸ்டால் (Liestal) பார்பிக்யூ பகுதியில் வன்முறை சம்பவம்: நால்வர் காயம், ஒருவர் கைது

லீஸ்டால் (Liestal) பார்பிக்யூ பகுதியில் வன்முறை சம்பவம்: நால்வர் காயம், ஒருவர் கைது

பாசெல்லான்ட் (Basel-Landschaft) கன்டோனிலுள்ள லீஸ்டால் (Liestal) பார்வைக் கோபுரம் அருகேயுள்ள பார்பிக்யூ பகுதியில் நேற்று பிற்பகல் இடம்பெற்ற வன்முறை சம்பவத்தில் நால்வர் காயமடைந்துள்ளனர். சம்பவத்துடன் தொடர்புடையதாக சந்தேகிக்கப்படும் நபரை போலீசார் டேசர் (Taser) பயன்படுத்தி கைது செய்துள்ளனர்.

பாசெல்லான்ட் காவல் துறை வெளியிட்ட தகவலின்படி, மாலை 4.15 மணிக்கு பின்னர் மூன்று ஆண்கள் அந்த பார்பிக்யூ பகுதியில் இருந்துள்ளனர். அவர்கள் போதைப்பொருள் பயன்படுத்தியிருக்கலாம் என ஆரம்ப தகவல்கள் தெரிவிக்கின்றன.

இதற்கிடையில், அந்த குழுவில் இருந்த 23 வயதுடைய சுவிஸ் நபர், அங்கு பொதுப் பெஞ்சில் பராமரிப்பு பணியில் ஈடுபட்டிருந்த சம்பவத்துடன் தொடர்பில்லாத 78 வயது முதியவரை திடீரென தாக்கியதாக போலீசார் தெரிவித்துள்ளனர். காயமடைந்த முதியவர் அங்கிருந்து தப்பித்து பாதுகாப்பான இடத்துக்குச் சென்றுள்ளார்.

சம்பவத்தை அமைதிப்படுத்த முயன்ற 20 வயதுடைய துருக்கி நாட்டைச் சேர்ந்த இளைஞரும் பின்னர் 23 வயது நபரால் தாக்கப்பட்டு காயமடைந்துள்ளார்.

போலீசார் சம்பவ இடத்துக்கு வந்தபோது, அந்தக் குழுவில் இருந்த மூன்றாவது நபரான காம்பியா (Gambia) நாட்டைச் சேர்ந்த 25 வயது ஆண் மயக்கநிலையிலிருந்ததாக தெரிவிக்கப்பட்டுள்ளது.

இதையடுத்து, வன்முறையில் ஈடுபட்டதாக சந்தேகிக்கப்படும் 23 வயது நபரை போலீசார் டேசர் பயன்படுத்தி கட்டுப்பாட்டுக்குள் கொண்டு வந்து கைது செய்தனர்.

சம்பவம் தொடர்பாக பாசெல்லான்ட் அரசுத் தரப்பு வழக்கறிஞர் அலுவலகம் குற்றவியல் விசாரணையை ஆரம்பித்துள்ளது. சம்பவத்தின் சரியான பின்னணி மற்றும் காரணங்கள் குறித்து மேலதிக விசாரணைகள் நடைபெற்று வருகின்றன.

மூலம்: பாசெல்லான்ட் காவல் துறை