போர் தாக்கம்: சுவிஸ் விமான டிக்கெட் கட்டணங்களில் எரிபொருள் கூடுதல் கட்டணம் உயர்வு ஈரானில் நிலவி வரும் பதற்றமான சூழ்நிலை மற்றும் போர் அச்சம் காரணமாக உலகளவில் விமான எரிபொருள் விலைகள் திடீரென உயர்ந்துள்ள நிலையில், Swiss International Air Lines (SWISS) மற்றும் அதன் இணை நிறுவனம் Edelweiss Air (எடெல்வைஸ்) விமான டிக்கெட் கட்டணங்களில் எரிபொருள் கூடுதல் கட்டணத்தை உயர்த்த முடிவு செய்துள்ளன. இந்த முடிவு, இந்நிறுவனங்கள் சேர்ந்துள்ள Lufthansa Group (லுஃப்தான்சா குழுமம்) மூலம் எடுக்கப்பட்டதாக தெரிவிக்கப்பட்டுள்ளது. SWISS நிறுவனம் வெளியிட்ட தகவலின்படி, உலக சந்தையில் எண்ணெய் விலைகளில் ஏற்பட்ட திடீர் மாற்றங்களின் காரணமாக இந்த கட்டண உயர்வு அவசியமாகியுள்ளது. விமான நிறுவனங்கள் பொதுவாக கட்டுப்படுத்த முடியாத செலவுகளை, குறிப்பாக எரிபொருள் செலவுகளை சமாளிப்பதற்காக இந்த கூடுதல் கட்டணத்தை வசூலிக்கின்றன. சமீபத்திய விலை உயர்வு இந்த அழுத்தத்தை மேலும் அதிகரித்துள்ளதாக துறையினர் கூறுகின்றனர். சர்வதேச விமான போக்குவரத்து அமைப்பான International Air Transport Association (IATA) வெளியிட்ட தரவுகளின்படி, ஐரோப்பாவில் ஒரு பேரல் விமான எரிபொருள் விலை தற்போது 214.70 அமெரிக்க டொலர்களாக உயர்ந்துள்ளது. கடந்த ஒரு மாத காலத்தில் இந்த விலை இரட்டிப்பாக அதிகரித்துள்ளதாகவும், இதே காலத்தில் மொத்த எண்ணெய் விலை சுமார் 50 சதவீதம் மட்டுமே உயர்ந்துள்ளதாகவும் குறிப்பிடப்பட்டுள்ளது. மேலும், வட அமெரிக்காவில் விமான எரிபொருள் விலை சுமார் 179 டொலர்களாக உள்ள நிலையில், ஆப்பிரிக்கா மற்றும் ஆசியாவில் அது 200 டொலர்களை மீறியுள்ளது. பயண பாதை மற்றும் தூரத்தைப் பொருத்து இந்த கூடுதல் கட்டணம் மாறுபடும் என்றும் விமான நிறுவனங்கள் தெரிவித்துள்ளன. உலக அரசியல் பதற்றங்களின் நேரடி தாக்கம் விமானத் துறையில் தெளிவாகக் காணப்படுகின்றது. இதன் விளைவாக எதிர்காலத்தில் விமான கட்டணங்களில் மேலும் மாற்றங்கள் ஏற்படும் வாய்ப்பும் இருப்பதாக நிபுணர்கள் எச்சரிக்கின்றனர்.
