அநாமதேய மின்னஞ்சலால் பரபரப்பு! WEF ஊழியர் மீது சதி குற்றச்சாட்டு கைவிடப்பட்டது!
அமெரிக்க அதிபர் டொனால்ட் டிரம்பின் 2026ஆம் ஆண்டு டாவோஸ் WEF பயணத்துக்கு முன்னதாக சுவிட்சர்லாந்தில் இடம்பெற்ற கைது சம்பவம் தொடர்பாக தற்போது புதிய தகவல்கள் வெளியாகியுள்ளன.
டிரம்ப் ஜனவரி 21ஆம் தேதி டாவோஸில் நடைபெற்ற உலக பொருளாதார மன்றத்தில் பங்கேற்றார்.
அவரது வருகைக்கு முன்னதாக, அமெரிக்கத் தூதரகத்துக்கு வந்த அநாமதேய மின்னஞ்சலில், டிரம்பின் உயிருக்கு அச்சுறுத்தல் இருப்பதாகவும், ஒரு WEF பெண் ஊழியர் தொடர்புடையவர் என்றும் குற்றச்சாட்டு முன்வைக்கப்பட்டது.
இதையடுத்து, மேற்கு சுவிட்சர்லாந்தில் பணியாற்றிய அந்த WEF ஊழியர் கைது செய்யப்பட்டு பல மணி நேரம் விசாரணைக்கு உட்படுத்தப்பட்டதாக ஊடகங்கள் தெரிவித்துள்ளன.
ஆனால் விசாரணையின் போது, டிரம்புக்கு எதிரான கொலைச் சதித்திட்டத்தில் அந்தப் பெண் ஈடுபட்டதற்கான ஆதாரங்கள் எதுவும் கிடைக்கவில்லை.
அவரது மின்னணு சாதனங்கள் உள்ளிட்டவற்றை ஆய்வு செய்தபோதும், அவர் உளவாளி என்பதற்கான ஆதாரம் கண்டறியப்படவில்லை என தெரிவிக்கப்பட்டுள்ளது.
டிரம்ப் சுவிட்சர்லாந்தை விட்டு வெளியேறிய பின்னர் அந்தப் பெண் விடுவிக்கப்பட்டார்.
மேலும், பல மாதங்கள் நீடித்த விசாரணைக்குப் பிறகு, குற்றவியல் நடவடிக்கைகளும் மே மாதத்தில் கைவிடப்பட்டதாக தெரிவிக்கப்பட்டுள்ளது.
இதற்கிடையில், இந்த குற்றச்சாட்டை முன்வைத்த அநாமதேய மின்னஞ்சலின் பின்னணி குறித்து ஜெனீவா அரசு வழக்கறிஞர் அலுவலகம் தனியாக விசாரணை மேற்கொண்டு வருவதாக தகவல்கள் தெரிவிக்கின்றன.
இந்த சம்பவம் தொடர்பான பல கேள்விகளுக்கு இன்னும் பதில் கிடைக்கவில்லை.
