சுவிஸ் சென்ட்கேலன் மாநிலத்தில் முனைவர் பட்டம் வென்று சாதனை படைத்த தமிழ்ப் பெண்

சுவிட்சர்லாந்து நாட்டில் அமைந்துள்ள சர்வதேச புகழ்பெற்ற செயிண்ட் கேலன் பல்கலைக்கழகத்தில், தனது முனைவர் பட்ட ஆய்வேட்டை வெற்றிகரமாகச் சமர்ப்பித்து சகானா சிவசெல்வம் முனைவர் பட்டம் பெற்றுள்ளார். மருத்துவத் தொழில்நுட்பம் மற்றும் டிஜிட்டல் சுகாதாரத் துறையில் அவர் மேற்கொண்டுள்ள இந்த உயரிய ஆய்வுச் சாதனை, சர்வதேச அளவில் உயர்கல்வி கற்க விரும்பும் தமிழ் சமூகத்தின் இளம் தலைமுறையினருக்கு பெரும் ஊக்கமளிப்பதாக அமைந்துள்ளது.

முனைவர் பட்ட ஆய்வுக்கு முன்னதாக, உலகளவில் முன்னணி உயர்கல்வி நிறுவனங்களில் ஒன்றாகத் திகழும் சுவிட்சர்லாந்தின் ஈடிஎச் சூரிச் பல்கலைக்கழகத்தில் சகானா சிவசெல்வம் மருத்துவத் தொழில்நுட்பத் துறையில் தனது முதுகலைப் பட்டப் படிப்பை நிறைவு செய்தார். அதைத் தொடர்ந்து, மருத்துவம் மற்றும் நவீன தொழில்நுட்பத் துறைகளில் தான் பெற்ற ஆழமான அறிவையும் பல்துறை அனுபவத்தையும் ஒருங்கிணைத்து, டிஜிட்டல் சுகாதாரம், தொழில்முனைவு மற்றும் மனித வாழ்நாள் நீடிப்பு ஆகிய முக்கியத் துறைகளை மையமாகக் கொண்டு தனது முனைவர் பட்ட ஆராய்ச்சியை திறம்பட முன்னெடுத்தார்.

மேற்கத்திய நாடுகளில் உள்ள உலகின் தலைசிறந்த பல்கலைக்கழகங்களில் தமிழர்கள் தங்களின் கல்வித் திறமையால் தொடர்ச்சியாகத் தடம் பதித்து வருகின்றனர். அந்த வகையில், மருத்துவம், தொழில்நுட்பம் மற்றும் வணிக நிர்வாகம் சார்ந்த பல்வேறு துறைகளை ஒருங்கிணைத்து தனது கல்விப் பயணத்தை வெற்றிகரமாக முடித்துள்ள சகானாவின் இந்த சாதனையை அவரது குடும்பத்தினர் மிகுந்த பெருமிதத்துடனும் மகிழ்ச்சியுடனும் பகிர்ந்து கொண்டுள்ளனர்.

உலகெங்கிலும் உள்ள தமிழ் அமைப்புகளும் கல்வியாளர்களும் அவருக்குத் தங்களது மனமார்ந்த வாழ்த்துக்களையும் பாராட்டுகளையும் தெரிவித்து வருகின்றனர். உயர்கல்வித் துறையில் தொடர்ந்து முன்னேறிச் சென்று சுவிட்சர்லாந்தில் முனைவர் பட்டம் பெற்று சாதனை படைத்துள்ள சகானா சிவசெல்வத்தின் எதிர்காலச் சேவைகளும் ஆய்வுகளும் மேன்மேலும் சிறக்க வாழ்த்துகள் குவிகின்றன.  சுவிஸ் தமிழ் ஊடகம் சார்பிலும் எமது வாழ்த்துக்களை தெரிவித்துக்கொள்ளுகிறோம்