இனி அண்டை வீட்டாருக்கே மின்சாரம் விற்கலாம்! சுவிஸில் புதிய மின் புரட்சி!

இனி அண்டை வீட்டாருக்கே மின்சாரம் விற்கலாம்! சுவிஸில் புதிய மின் புரட்சி!

சுவிட்சர்லாந்தில் மின்சார சந்தையில் மிகப்பெரிய மாற்றம் தொடங்கியுள்ளது. இனி சூரிய மின்சாரம் உற்பத்தி செய்யும் வீட்டு உரிமையாளர்கள், அதை நேரடியாக தங்கள் அண்டை வீட்டாருக்கும், வாடகைதாரர்களுக்கும் விற்கும் வாய்ப்பு கிடைத்துள்ளது.

இந்த புதிய திட்டம் Local Energy Community, அதாவது LEG என அழைக்கப்படுகிறது. இதில் இணையும் உறுப்பினர்கள், தாங்களே உற்பத்தி செய்யும் சூரிய மின்சாரத்தை ஒருவருக்கொருவர் குறைந்த கட்டணத்தில் வாங்கவும் விற்கவும் முடியும். இதனால் மின்சார செலவு குறைவதுடன், சூரிய மின் அமைப்புகளின் வருமானமும் அதிகரிக்கிறது.

ஏற்கனவே சுவிட்சர்லாந்தில் 700-க்கும் மேற்பட்ட உள்ளூர் மின்சாரக் கூட்டமைப்புகள் செயல்பட்டு வருகின்றன. ஆயிரக்கணக்கான நுகர்வோரும், சூரிய மின்சார உற்பத்தியாளர்களும் இந்த திட்டத்தின் மூலம் பயனடைந்து வருகின்றனர்.

குறிப்பாக சூரிச் மற்றும் வின்டர்தூர் நகரங்கள் இந்த முயற்சியில் முன்னிலை வகிக்கின்றன. அங்கு நூற்றுக்கணக்கான LEG-கள் உருவாக்கப்பட்டுள்ளதுடன், மின்சாரக் கட்டணம் வழக்கத்தை விட சுமார் 15 சதவீதம் வரை குறைவாக இருப்பதாக தெரிவிக்கப்பட்டுள்ளது.

இதற்கிடையில், 2027 முதல் ஒரு முக்கிய மாற்றமும் வரவிருக்கிறது. சூரிய மின்சாரத்தை நேரடியாக தேசிய மின் கட்டமைப்பிற்கு வழங்கும் போது கிடைக்கும் விலை, சந்தை நிலவரத்தைப் பொறுத்தே நிர்ணயிக்கப்படும். சில நேரங்களில் மிகவும் குறைந்த விலை அல்லது எதிர்மறை விலையும் ஏற்படலாம் என நிபுணர்கள் எச்சரிக்கின்றனர்.

அதனால், எதிர்காலத்தில் சூரிய மின்சாரத்தை அண்டை வீட்டாருக்கே நேரடியாக விற்பனை செய்வது, வீட்டு உரிமையாளர்களுக்கும் நுகர்வோருக்கும் அதிக லாபமும் பாதுகாப்பும் தரும் புதிய வழியாக மாறும் என்று எதிர்பார்க்கப்படுகிறது. சுவிட்சர்லாந்தின் மின்சார சந்தையில் இது ஒரு முக்கிய திருப்புமுனையாக பார்க்கப்படுகிறது.