மீண்டும் சுவிஸை தாக்கும் வெப்ப அலை! 35°C வரை உயரப்போகும் வெப்பநிலை!

மீண்டும் சுவிஸை தாக்கும் வெப்ப அலை! 35°C வரை உயரப்போகும் வெப்பநிலை!

சுவிட்சர்லாந்தில் தற்போது நிலவும் இதமான கோடை வானிலை இன்னும் சில நாட்களிலேயே முடிவுக்கு வரப்போகிறது. மீண்டும் ஒரு சக்திவாய்ந்த வெப்ப அலை நாட்டை தாக்க உள்ளதாக மெட்டியோஸ்விஸ் மற்றும் SRF Meteo எச்சரித்துள்ளன.

இன்று தாழ்வான பகுதிகளில் வெப்பநிலை 26 டிகிரி செல்சியஸை எட்டுகிறது. அதே நேரத்தில் டிசினோ மற்றும் வாலாய்ஸ் போன்ற பகுதிகளில் ஏற்கனவே 30 டிகிரியை நெருங்கியுள்ளது. சனிக்கிழமைக்குள் நாட்டின் பல பகுதிகளிலும் வெப்பநிலை 30 டிகிரியை எட்டும் என கணிக்கப்பட்டுள்ளது.

இருப்பினும், ஞாயிற்றுக்கிழமை மட்டும் சிறிய மாற்றம் இருக்கும். இடியுடன் கூடிய மழையும் சாரல் மழையும் பெய்ய வாய்ப்புள்ளதால், அதிகபட்ச வெப்பநிலை 25 டிகிரி வரை குறையலாம்.

ஆனால் இந்த குளிர்ச்சி நீண்ட நாட்கள் நீடிக்காது. அடுத்த செவ்வாய்க்கிழமையிலேயே புதிய வெப்ப அலை தொடங்கும் என வானிலை ஆய்வாளர்கள் தெரிவிக்கின்றனர். சூரிச் மற்றும் பேசல் நகரங்களில் 31 டிகிரியும், வியாழக்கிழமைக்குள் 33 டிகிரி செல்சியஸும் பதிவாகலாம்.

இதோடு முடிவில்லை. ஆகஸ்ட் மாத தொடக்கத்தில் வெப்பநிலை 35 டிகிரி செல்சியஸை எட்டும் அபாயமும் இருப்பதாக தற்போதைய முன்னறிவிப்புகள் கூறுகின்றன.

பகல் மட்டுமல்ல, இரவுகளும் வெப்பமாக மாறவுள்ளன. தற்போது 11 டிகிரி வரை குறையும் இரவு வெப்பநிலை, அடுத்த வாரம் 17 முதல் 20 டிகிரி வரை உயரக்கூடும். எனவே, அதிக தண்ணீர் அருந்துவது, நேரடி வெயிலை தவிர்ப்பது மற்றும் வயதானவர்கள், குழந்தைகள் மீது கூடுதல் கவனம் செலுத்துவது மிகவும் அவசியம்.