ஜெனீவாவில் அமெரிக்கா–ஈரான் பேச்சுவார்த்தை : சுவிட்சர்லாந்து வரவேற்பு
ஜெனீவாவில் அமெரிக்கா–ஈரான் பேச்சுவார்த்தை: சுவிட்சர்லாந்து வரவேற்பு
அடுத்த வாரம் ஜெனீவா (Genève) நகரில் அமெரிக்கா மற்றும் ஈரான் நாடுகளுக்கிடையிலான முக்கியமான அரசியல் பேச்சுவார்த்தைகள் நடைபெற உள்ளதாகத் தெரிவிக்கப்பட்டுள்ளது. இந்த சந்திப்பை ஓமான் சுல்தானகம் ஏற்பாடு செய்து நடத்தவுள்ளது. இதுகுறித்த தகவலை பிரிட்டிஷ் செய்தி நிறுவனம் ராய்ட்டர்ஸ் வெளியிட்டதைத் தொடர்ந்து, சுவிட்சர்லாந்தின் வெளிநாட்டு விவகாரங்களுக்கான மத்திய துறை (DFAE) அதிகாரப்பூர்வமாக உறுதிப்படுத்தியுள்ளது.
DFAE தகவல் தொடர்பு பொறுப்பாளர் நிக்கோலாஸ் பிடோ, சம்பந்தப்பட்ட தரப்புகளுடன் துறை தொடர்ந்து தொடர்பில் இருப்பதாகவும், பதற்றத்தைக் குறைக்கும் நோக்கில் நடைபெறும் எந்தவொரு தூதரக முயற்சிக்கும் சுவிட்சர்லாந்து ஆதரவு வழங்கத் தயாராக இருப்பதாகவும் தெரிவித்துள்ளார். இந்த பேச்சுவார்த்தைகளை சுவிட்சர்லாந்து வரவேற்கின்றதுடன், அவை அமைதிக்கான முன்னேற்றமாக அமையும் என நம்பிக்கை தெரிவித்துள்ளது.
இந்நிலையில், அமெரிக்க ஜனாதிபதி டொனால்ட் டிரம்ப், ஈரானில் ஆட்சிமாற்றம் ஏற்படுவது சிறந்ததாக இருக்கும் என கருத்து தெரிவித்ததாக கூறப்படுகிறது. மேலும், ஒரு நியாயமான ஒப்பந்தம் மூலம் அமெரிக்காவின் இராணுவ தாக்குதலை ஈரான் தவிர்க்க முடியும் என்றும் அவர் குறிப்பிட்டுள்ளார்.
கடந்த ஆண்டில் ஈரானின் அணு திட்டம் தொடர்பாக வாஷிங்டன் மற்றும் தெஹ்ரான் இடையே பல கட்ட பேச்சுவார்த்தைகள் நடைபெற்றிருந்தாலும், எந்த உறுதியான ஒப்பந்தமும் எட்டப்படவில்லை. அதன் தொடர்ச்சியாக கடந்த வாரம் ஓமான் தலைநகரமான மஸ்கட் (Muscat) நகரில் புதிய பேச்சுவார்த்தைகள் தொடங்கியுள்ளன. இப்போது ஜெனீவாவில் நடைபெற உள்ள இந்த சந்திப்பு, இரு நாடுகளுக்கிடையிலான பதற்றத்தை குறைக்கும் முயற்சியாக பார்க்கப்படுகிறது.
சுவிட்சர்லாந்து நீண்ட காலமாக சர்வதேச நடுவர் தலமாக அறியப்படும் நிலையில், ஜெனீவாவில் நடைபெறும் இந்த பேச்சுவார்த்தைகள் உலக அரசியலில் முக்கியத்துவம் பெறும் நிகழ்வாகக் கருதப்படுகிறது.
