எச்சரிக்கை.! சூரிக் கன்டோனில் 3 லட்சம் தொழிலாளர் பற்றாக்குறை.!!

எச்சரிக்கை.! சூரிக் கன்டோனில் 3 லட்சம் தொழிலாளர் பற்றாக்குறை.!!

சூரிக் கன்டோன் (Zurich) எதிர்காலத்தில் கடும் தொழிலாளர் பற்றாக்குறையை சந்திக்கக்கூடும் என அங்குள்ள அதிகாரிகள் எச்சரிக்கை விடுத்துள்ளனர். கன்டோன் நிர்வாகம் வெளியிட்டுள்ள மதிப்பீட்டின் படி, 2050 ஆம் ஆண்டுக்குள் சூரிக் கன்டோனில் சுமார் 3 லட்சம் பணியாளர்கள் குறைவாக இருக்கலாம் என்ற சூழ்நிலை உருவாகும் அபாயம் உள்ளது.

இந்த அதிகரிக்கும் தொழிலாளர் பற்றாக்குறைக்கு முக்கிய காரணமாக மக்கள்தொகை அமைப்பில் ஏற்பட்டுவரும் மாற்றங்கள் சுட்டிக்காட்டப்படுகின்றன. பொதுமக்கள் வயதானவர்களாகி வரும் நிலையில், பிறப்பு விகிதம் தொடர்ந்து குறைந்து வருவதே இதற்கான பிரதான காரணம் என அதிகாரிகள் தெரிவித்துள்ளனர். குறிப்பாக, வேலை செய்யக்கூடிய வயதுடையவர்களின் எண்ணிக்கையை விட ஓய்வு வயதை அடைவோரின் எண்ணிக்கை மிக வேகமாக உயர்ந்து வருவதாக கன்டோன் நிர்வாகம் வெளியிட்ட செய்திக் குறிப்பில் குறிப்பிடப்பட்டுள்ளது.

எந்தவொரு முன்னெச்சரிக்கை நடவடிக்கைகளும் எடுக்கப்படாவிட்டால், சூரிக் கன்டோன் 2050 ஆம் ஆண்டுக்குள் 3 லட்சம் பணியாளர்கள் வரை பற்றாக்குறையை எதிர்கொள்ள வேண்டிய நிலை ஏற்படும் என எச்சரிக்கப்படுகிறது. இதன் விளைவாக ஓய்வூதியம், சுகாதார சேவைகள் மற்றும் நீண்டகால பராமரிப்பு செலவுகள் கணிசமாக உயர்ந்து, அரசின் நிதிசுமை மேலும் அதிகரிக்கும் என்றும் அதிகாரிகள் கூறியுள்ளனர்.

சுவிட்சர்லாந்தின் பொருளாதார மையமாக கருதப்படும் சூரிக் கன்டோனில் இந்தப் போக்கு தொடர்ந்தால், தொழில்துறை, சேவைத் துறை மற்றும் சுகாதாரத் துறைகள் உள்ளிட்ட பல்வேறு துறைகளில் பணியாளர் தேவை கடுமையாக பாதிக்கப்படலாம். இதனால் குடியேற்றக் கொள்கை, பெண்களின் வேலைவாய்ப்பு பங்கேற்பு மற்றும் மூத்தவர்களின் நீண்டகால வேலைவாய்ப்பு போன்ற விடயங்களில் புதிய தீர்வுகள் அவசியமாகலாம் என நிபுணர்கள் கருத்து தெரிவிக்கின்றனர்.

© KeystoneSDA