சுவிட்சர்லாந்தில் வீட்டு தட்டுப்பாடு மேலும் தீவிரமாவதற்கான அபாயம்
சுவிட்சர்லாந்து (Switzerland) முழுவதும் நிலவும் வீட்டு தட்டுப்பாடு அடுத்த இரண்டு ஆண்டுகளில் மேலும் மோசமடையும் என மத்திய அரசு கணிப்பிட்டுள்ளது. மத்திய வீடமைப்பு அலுவலகத்தின் (Federal Housing Office) இயக்குநர் Martin Tschirren இதுகுறித்து ஊடகங்களுக்கு விளக்கம் அளித்துள்ளார்.
அவர் கூறுகையில், இந்த எதிர்மறையான நிலைக்கு முக்கிய காரணமாக மக்கள்தொகை மாற்றங்கள் உள்ளன எனத் தெரிவித்துள்ளார். குறிப்பாக, குடியேற்றம் காரணமாக மக்கள் தொகை தொடர்ந்து அதிகரித்து வருவதும், அதற்கு இணையாக போதுமான வீடுகள் சந்தையில் இல்லாததும் முக்கிய பிரச்சினைகளாக உள்ளன. ஏற்கனவே உள்ள வீட்டு இருப்பு தேவையை பூர்த்தி செய்யாத நிலையில், புதிய குடியிருப்பு கட்டுமானங்கள் போதிய அளவில் நடைபெறாததும் நிலைமையை மேலும் கடுமையாக்கி வருகிறது.
சுவிட்சர்லாந்தில் நகரங்கள் மற்றும் பொருளாதார மையப் பகுதிகளில் வீட்டு வாடகை உயர்வு, காலி வீடுகள் குறைவு போன்ற பிரச்சினைகள் கடந்த சில ஆண்டுகளாகவே பொதுமக்களை பாதித்து வருகின்றன. தற்போது இந்தப் போக்கு தொடர்ந்தால், நடுத்தர மற்றும் குறைந்த வருமானம் கொண்ட குடும்பங்கள் வீடு தேடுவதில் அதிக சிரமங்களை சந்திக்க வேண்டிய நிலை உருவாகும் என நிபுணர்கள் எச்சரிக்கின்றனர்.
மத்திய அரசு மற்றும் கன்டோன்கள் இணைந்து கட்டுமானத் துறையை ஊக்குவிக்கும் நடவடிக்கைகள் எடுக்கப்படாவிட்டால், வீட்டு தட்டுப்பாடு சமூக மற்றும் பொருளாதார சவாலாக மாறக்கூடும் என்றும் அதிகாரிகள் சுட்டிக்காட்டுகின்றனர்.
© KeystoneSDA
